Abirukanwe n'Amerika bareze Ghana ku gufungwa 'binyuranyije n'amategeko'

Umunyamategeko w'abantu 11 bafungiye muri Ghana nyuma yuko birukanwe muri Amerika, yabwiye BBC ko bareze leta y'icyo gihugu cyo muri Afurika y'uburengerazuba.

Oliver-Barker Vormawor yavuze ko abirukanwe batarenze ku itegeko na rimwe rya Ghana, ndetse ko kubera iyo mpamvu ifungwa ryabo mu kigo cya gisirikare rinyuranyije n'amategeko.

Uwo munyamategeko yongeyeho ko ashaka ko leta ya Ghana igeza iryo tsinda mu rukiko, ndetse igasobanura impamvu bafunze binyuranyije n'ubushake bwabo.

Leta ya Ghana nta cyo yari yatangaza kuri icyo kirego, ariko mbere yavuze ko iteganya kwemera kwakira abandi bantu 40 birukanwe.

Abadepite batavuga rumwe n'ubutegetsi barimo gusaba ko ayo masezerano yo kwakira abirukanwe n'Amerika ahagarikwa aka kanya, agategereza kwemezwa n'inteko ishingamategeko, bavuga ko ibyo bisabwa n'amategeko ya Ghana.

Mu cyumweru gishize, Perezida wa Ghana John Mahama yavuze ko abirukanwe n'Amerika 14 bakomoka muri Afurika y'uburengerazuba, bageze muri Ghana nyuma y'amasezerano icyo gihugu cyagiranye n'Amerika.

Nyuma yavuze ko bose basubijwe mu bihugu bavukamo, nubwo Minisitiri w'ububanyi n'amahanga wa Ghana Samuel Okudzeto Ablakwa yamuvuguruje akavuga ko benshi muri bo ari bo gusa basubijwe mu bihugu bavukamo.

Ikirego umunyamategeko Vormawor yagejeje mu rukiko kivuguruza abo bategetsi bombi, kikavuga ko abirukanwe 11 bagifungiye muri Ghana.

Uko ari 11, bari bafungiye mu kigo cy'Amerika mbere yuko baboheshwa iminyururu bakirukanwa batwawe mu ndege ya gisirikare itwara imizigo, nkuko bikubiye mu nyandiko zagejejwe mu rukiko.

Uku kwirukana abantu muri Amerika kuri muri gahunda y'ubuhezanguni ya leta y'Amerika ijyanye n'abinjira mu gihugu, kuva Perezida w'Amerika Donald Trump asubiye ku butegetsi muri Mutarama (1) uyu mwaka.

Yasezeranyije kwirukana abimukira ku bwinshi bageze mu gihugu mu buryo bunyuranyije n'amategeko, akabikora ku kigero kitari cyarigeze kigerwaho mbere.

Ku wa mbere, amagambo ya minisitiri w'ububanyi n'amahanga wa Ghana yasubiwemo n'ibiro ntaramakuru Reuters avuga ko icyemezo cyo kwemera kwakira abirukanwe n'Amerika cyashingiye ku "ihame ry'ubutabazi no kugira impuhwe kwa kinyafurika".

Yagize ati: "Ibi ntibikwiye gusobanurwa nabi nko kwemera gahunda zijyanye n'abinjira mu gihugu z'ubutegetsi bwa Trump."

Batanu mu birukanwe, Abanya-Nigeria batatu n'Abanya-Gambia babiri, na bo bareze leta y'Amerika, bavuga ko bari barinzwe n'itegeko ry'urukiko ndetse ko batagakwiye kuba barirukanwe muri Amerika.