Mozambique: Kwicwa kw'abarobyi babiri baciwe imitwe kwateje ubwoba mu baturage

Kwicwa kw'abagabo babiri baciwe imitwe bikozwe n'abacyekwa ko ari intagondwa zigendera ku mahame akaze ziyitirira Islam, kurimo guteza umutima uhagaze mu majyaruguru ya Mozambique kuko amarorerwa nk'ayo atari akimenyerewe mu myaka ya vuba aha ishize.

Ibi biterwa nuko ingabo zo mu karere zo mu muryango w'ibihugu byo muri Afurika y'amajyepfo (SADC) hamwe n'ingabo z'u Rwanda zahoherejwe kuva mu myaka ibiri ishize, mu gufasha ingabo za Mozambique kwisubiza ubutaka bwari bwarafashwe n'intagondwa mu ntara ya Cabo Delgado yo mu majyaruguru.

Nubwo uko gutabara kw'izo ngabo kwatumye abaturage bamwe basubira mu byaro byabo, byanatumye mu gusubira inyuma kw'intagondwa zishobora kwigarurira abanyacyaro mu bitekerezo, zikaba zigura ibiribwa byabo.

Mu gihe cya vuba aha gishize, izi ntagondwa zavuze ko abo zirwanya ari abasirikare, ko nta cyo zipfa n'abaturage.

Ariko ku wa mbere iyo mirambo yaciwe imitwe y'abarobyi babiri yasanzwe mu gisambu hafi y'icyaro cya Litamanda mu karere ka Macomia mu ntara ya Cabo Delgado.

Bicyekwa ko abo barobyi bishwe mu mpera y'icyumweru gishize. Itsinda ry'intagondwa ryabonywe ku wa gatandatu hafi y'aho abo bagabo babiri bari batuye, ku ntera ya kilometero hafi 20 uvuye i Litamanda.

Ibi bibaye hashize amezi abiri habayeho ukundi guca umutwe muri Cabo Delgado.

Birimo gutera ubwoba bwinshi mu baturage bo muri ako karere, bari barizeye ko ikibazo cy'umutekano mucye kimaze imyaka itandatu, ubu kiri hafi kurangira.