Igisirikare cya Mozambique ‘cyisubije’ umujyi wari wafashwe n’intagondwa
Ahavuye isanamu, AFP
Amakuru ava muri Mozambique aravuga ko igisirikare cyisubije umujyi ukomeye wari warafashwe n'intagondwa zigendera ku mahame akaze ya kisilamu mu ntangiriro y'uyu mwaka.
Mu mezi macye ashize, izo ntagondwa zagabye ibitero bikaze mu buryo budasanzwe, zifata imijyi ya Quissangoa na Mocimboa da Praia yo mu majyaruguru y'igihugu.
Hashize ibyumweru bitandatu izo ntagondwa zigeze mu majyaruguru ya Mozambique - aho zageze zitwaje intwaro nyinshi zigafata imijyi mikuru z'intara ebyiri.
Ibyo byatumye habaho kugira impungenge ko icyatangiye nk'amakimbirane aciriritse cyarimo guhinduka ikibazo gikomeye kurushaho.
None ubu - nkuko amakuru menshi aturuka muri ako karere abivuga - kera kabaye igisirikare cya Mozambique cyisubije umujyi wa Quissangoa uri ku cyambu.
Ayo makuru avuga ko bisa nkaho cyawisubije nta mirwano ibaye, nkuko umunyamakuru wa BBC Andrew Harding uri i Johannesburg muri Afurika y'epfo abivuga.
Amakuru avuga kandi ko imirongo ya telefone iri kongera gusubizwaho muri ako karere, ndetse no ku cyambu kiri hafi aho cya Mocimboa da Praia.
Leta ya Mozambique ni gacye cyane ivuga ku kibazo cy'umutekano ukomeje kuzamba mu ntara ya Cabo Delgado. Ndetse abategetsi bakumiriye bikomeye itangazamakuru ryigenga.
Ariko umutwe wiyita leta ya kisilamu (Islamic State) - ufasha izo ntagondwa - wavuze ko baherutse gufata ikindi kigo cya gisirikare, bakanafata izindi ntwaro.
Izo ntagondwa zishinja leta ya Mozambique gutererana abacyene, ariko uwo mutwe wateye ubwoba abaturage benshi b'abasivile, ukora ubwicanyi burimo no guca abantu imitwe.
