China: Kuki barimo kwigaragambya bafite impapuro z'umweru zitanditseho?

Imyigaragambyo ikomeye yo kwamagana ingamba zikakaye za leta y’Ubushinwa ku cyorezo cya Covid yakajije umurego muri 'weekend' aho bamwe babonetse bitwaje impapuro z’umweru zitanditseho ikintu na kimwe.

Mu mijyi ikomeye nka Beijing na Shanghai, no muri kaminuza zitandukanye, abantu ibihumbi bigabije imihanda bamagana ingamba za leta za ‘zero covid’ ndetse bamwe basaba Perezida Xi Jinping kwegura.

Ku wa mbere, abapolisi benshi batangatanze ku rubuga rwabereyeho imyigaragambyo muri Shanghai babuza ko yongera kuba.

Leta ntiremera ko hari imyigaragambyo cyangwa ngo igire icyo iyivugaho ku mugaragaro.

Kuri uyu wa mbere Ubushinwa bwabaruye abantu bashya 40,052 banduye Covid, ni inshuro ya gatanu y’imibare iri hejuru cyane ku munsi. 

Impinduramatwara y'urupapuro rwera?

Impapuro zitanditseho zabaye ikirango muri iyi myigaragambyo, bamwe ubu barabyita ‘Impinduramatwara y’urupapuro rwera’, abandi ‘Impinduramatwara ya A4’. 

Mu bice bitandukanye mu gihugu yabereyemo, abantu babonetse bazamuye impapuro z’umweru. Bamwe bavuga ko ari ukwirinda ko leta ibabuza ishingiye ku byo banditse.

Muri videwo yakwirakwiriye cyane kuva ku wa gatandatu, umugore wo muri Communication University of Nanjing yari yazamuye urupapuro rwera mbere y’uko umugabo arumushikuza.

Mu yandi mashusho abanyeshuri benshi babonetse bitwaje impapuro nk’izo zitanditseho bahagaze kandi bacecetse. Ibi byabonetse no mu yindi mijyi mikuru muri 'weekend' ishize.

Umwe mu bagore witabiriye iyi myigaragambyo i Shanghai yabwiye BBC ati: “Nta kintu na kimwe kiri ku rupapuro, ariko tuzi ikiriho.”

Frank Tsai wabonye imyigaragambyo muri Shanghai yabwiye BBC ko yatunguwe n’uburyo yitabiriwe bikomeye.

Ati: “Sindabona imyigaragambyo ingana gutya muri Shanghai mu myaka 15 maze mba hano.” 

Avuga ko mu myaka 20 cyangwa 30 ishize hagiye haba imyigaragambyo ku bintu runaka birimo uburenganzira bw’abakozi, no kunyaga ubutaka.

Gusa avuga ko “Micyeya cyane” ari yo yabaga yibasira leta kandi “urebye nta kintu” cyabaye cyibasiraga leta ubwayo mbere.

Abigaragambya barashaka iki?

Bitandukanye n’ibindi bihugu ku isi byiyemeje kubana na Covid ku kigero runaka, Ubushinwa bwafashe ingamba zo gukomeza kuyirwanya bikomeye no kuyirandura muri gahunda bize ‘zero covid’. 

Letea ivuga ko iyi gahunda irokora ubuzima bwa benshi, kuko hatabayeho ingamba nk'izi iki cyorezo cyakwibasira benshi, cyane cyane abari mu zabukuru. 

Amategeko akarishye ya guma mu rugo yatumye abapfa bakomeza kuba bacye kuva iki cyorezo cyatangira – imibare ya leta ubu ivuga ko barenga gato 5,200.

Ariko abaturage ibi ntibabyishimiye, babona ko ingamba za leta ziri kubazahaza mu buryo butandukanye kurusha icyo cyorezo, byatumye bamwe bajya kwigaragambya.

Profeseri Ho-fung Ho wo muri Kaminuza ya Johns Hopkins muri Amerika avuga ko iyi myigaragambyo yo muri iyi minsi ari “ibihe bigoye” kuri Perezida Xi Jinping.

Ho-fung yabwiye BBC ko nubwo gukwirakwira kw’imyigaragambyo ari ibisanzwe mu Bushinwa, iyi ni “ikigeragezo cya mbere gikomeye” ku butegetsi bwa Xi kuko bamwe mu bigaragambya barimo kumusaba kwegura.

Uyu avuga ko Perezida Xi “yishyize mu nguni” mu myaka ibiri ishize ashyiraho ingamba zikarishye za 'zero covid' “zidafite iherezo rigaragara”.

Imyigaragambyo yabaye muri 'weekend' mu Bushinwa yatumye amasoko y’imari n’imigabane n’ibindi by’agaciro bimanuka.

Isoko ry’imari n’imigabane rya Hong Kong ryaguyeho 4% none ku wa mbere, ifaranga rya Yuan rikoreshwa imbere mu Bushinwa rigwaho 7.23% imbere y’idorari rya Amerika.

Xi agiye gukora iki? – uwahoze ari PM wa Australia

Kevin Rudd, wahoze ari Minisitiri w’intebe wa Australia, yavuze ko imyigaragambyo iri mu Bushinwa idasanzwe kandi “ikomeye”.

Rudd yabwiye BBC ko kuva mu myigaragambyo ikomeye yo mu 1989 i Beijing mu rubuga rwa Tiananmen Square yarangijwe ku ngufu za leta ya gikomunisti, imyigaragambyo yabaye micye. 

Rudd yongeraho ko imyigaragambyo irimo kuba ubu isa n’aho atari irwanya ingamba za Covid gusa.

Ati: “Hari ingingo ko ibi ari ikimenyetso cy'ikindi kintu cyagutse, twavuga nko, kutizera icyo ishyaka riri ku butegetsi n’ubutegetsi bwa Xi Jinping barimo gukora.

“Ikibazo gikomeye ni icyo ubutegetsi bugiye kubikoraho.”