Amufashe mu kiganza, Trump yasekeje abantu avuga ko ashaka gutereka inzara ze zikaba ndende nk'iza Nicki Minaj

Inyandiko gusa
Insiguro ya video, Reba Nicki Minaj avuga ati: 'Nshobora kuba ndi mufana wa mbere wa Trump'
    • Umwanditsi, Paul Glynn
    • Igikorwa, Culture reporter

Mu gusetsa abantu, Perezida Donald Trump yatangaje ko ashaka gutereka inzara ze zikaba ndende nk'iz'umuhanzi wa rap Nicki Minaj wari waje mu gikorwa cyo gushyigikira politike ye nshya yo kuzigamira abana bakivuka n'abataravuka.

Nicki, umunyamerika wavukiye mu birwa bya Trinidad na Tobago, muri icyo gikorwa cyo ku wa gatatu yavuze ko ari "umufana wa mbere" wa Donald Trump, ndetse anarata visa ye y'agaciro ka zahabu ya Trump itanga uburenganzira bwo gutura muri Amerika hamwe n'inzira yo kubona ubwenegihugu.

Iyo izwi nka 'Gold Card Visa' ni umushinga watangijwe na Donald Trump mu kwezi gushize aho iyi visa ihabwa abantu b'abakire bashobora kwishyura nibura miliyoni imwe y'amadorari.

Trump yahamagaye Nicki Minaj kuri 'podium' i Washington DC ubwo yari yaje gushyigikira umushinga we yise "Trump Accounts", wo gufungura konti zo kuzigamira abana mw'ishoramari.

Izo konti Trump avuga ko zizagenera buri mwana wavukiye muri Amerika mu myaka iri imbere umushahara w'amadorali $1,000 ubwo azaba agize imyaka 18.

Minaj waje muri Amerika azanye n'ababyeyi be akiri umwana, mbere wahoze anenga politike ya Trump ku bimukira, nyuma yaje guhindura aba umwe mu bashyigikira cyane Trump.

U.S. President Donald Trump and musician Nicki Minaj hold hands onstage at the U.S. Treasury Department's Trump Accounts Summit, in Washington, D.C., U.S. January 28, 2026. REUTERS/Kevin Lamarque TPX IMAGES OF THE DAY "Perezida wa Leta Zunze Ubumwe za Amerika Donald Trump n’umuraperi Nicki Minaj bafatanye intoki ku rubyiniro muri Trump Accounts Summit y’Ishami ry’Imari ya Amerika, i Washington, D.C., muri Amerika, ku ya 28 Mutarama 2026." REUTERS/Kevin Lamarque TPX IMAGES OF THE DAY

Ahavuye isanamu, Reuters

Insiguro y'isanamu, Minaj, with her trademark long nails, held hands with Trump on stage"Minaj, ufite inzara ze ndende zizwi cyane, yafashe intoki za Trump ku rubyiniro."

Afashe intoki za Trump kuri 'podium', Nicki Minaj ahawe umwanya yagize ati: "Navuga ko nshobora kuba ndi umufana wa mbere wa Perezida, kandi ibyo ntabwo bizahinduka.

"Kandi urwango cyangwa ibyo abantu bavuga, ntacyo bimbwiye na gato. Ahubwo bintera imbaraga zo kumushyigikira kurushaho."

Yanerekanye kandi ikarita ye nshya ya 'gold card', ifite ho isura ya Trump, mu butumwa kuri X afite umutwe ugira uti: "Welp."

Ati: "Turangiza iby'impapuro z'ubwenegihugu uyu munsi nk'uko perezida wanjye w'igitangaza, w'ineza kandi w'akataraboneka yabiteguye," anongeraho ko iyi karita yayibonye "nta kiguzi na kimwe".

'Trump Gold card' ni iki?

Tambuka X ubutumwa
Uremeye ibiri kuri X?

Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.

Uragaba: BBC ntibazwa ibiva ku zindi mbuga.

Impera ya X ubutumwa

Skip podcast promotion and continue reading
WhatsApp channel ya BBC Gahuza

Amakuru ya BBC Gahuza ako kanya kuri WhatsApp yawe

Kanda hano ujyeho

End of podcast promotion

Ni umushinga yatangije mu kwezi gushize, nk'inzira yihuse ku bimukira bakize nka Nicki Minaj kugira ngo bagere ku bwenegihugu bwa Amerika.

Bishyura miliyoni imwe y'amadorari (hafi miliyari imwe n'igice FRW) ndetse na $15,000 (miliyoni 21 Frw) yo gukorerwa iyo karita kugira ngo babone uburenganzira bwo gutura muri Amerika.

Ibi byaranenzwe cyane kuko byatangijwe mu gihe Perezida Trump ashyize ingufu mu kwirukana abimukira bandi binjiye muri Amerika binyuranyije n'amategeko.

Mu butumwa yanditse kuri Facebook mu 2018 anenga gahunda ya leta yo gutandukanya abana n'imiryango yabo, Nicki Minaj umuraperi ubu w'icyamamare mu ndirimbo nka Super Bass, yavuze ko yaje muri Amerika akiri umwana w'imyaka itanu mu buryo bunyuranyije n'amategeko.

Icyo gihe arwanya politike yo kwirukana abimukira yaranditse ati: "Sinshobora gutekereza ubwoba bwo kuba ahantu ntazi no kubona ababyeyi banjye babanyambura mfite imyaka itanu. Ibi biteye ubwoba kuri njye."

"Perezida wa Leta Zunze Ubumwe za Amerika Donald Trump n’umuraperi Nicki Minaj bahagaze hamwe ku rubyiniro muri Trump Accounts Summit y’Ishami ry’Imari rya Amerika, i Washington DC."

Ahavuye isanamu, Reuters

Insiguro y'isanamu, "Nicki Minaj na Donald Trump bahagaze hamwe kuri 'podium' mu gikorwa cya Trump Accounts Summit

Mu 2024, mu gihe yari muri TikTok Streaming, Minaj yagize ati: "Ntabwo ndi umunyamerika. Ibyo si ibintu bidasanzwe?

"Navukiye ku kirwa cyiza kitwa Trinidad na Tobago. Ariko maze imyaka myinshi ndi muri Amerika. Watekereza ko kubera amadolari menshi nagiye nishyura mu misoro muri iki gihugu, ko nari kuba narahawe ubwenegihugu bw'icyubahiro imyaka myinshi, myinshi cyane ishize."

Ikarita ya zahabu ya Minaj ubu imuha uburenganzira budafite imipaka bwo gutura muri Amerika, ariko kugeza n'ubu si umwenegihugu wa Amerika bitewe n'amasezerano y'iyo karita.

Muri icyo gikorwa cyo ku wa gatatu Trump yasekeje abantu avuga ko azatereka inzara ze zikaba ndende nk'iza Minaj, maze afata intoki za Minaj.

Minaj na we yavuze ko atazareka abanzi b'uyu perezida w'umuherwe bakomeza kumusebya, yongeyeho ati:"Afite imbaraga nyinshi ziremereye inyuma ye, kandi Imana iramurinda. Amen."

Minaj ariko hari benshi bamunenze gushyigikira Trump muri ibi bihe imyigaragambyo yo muri Leta ya Minnsota yiciwemo abantu babiri barimo umugabo wari umuforomo bikozwe n'abapolisi bashinzwe kubahiriza ingamba z'abinjira n'abasohoka bazwi nka ICE.

Ku wa gatatu muhanzi w'icyamamare Bruce Springsteen yasohoye indirimbo irwanya ICE yise Streets Of Minneapolis.

Mu butumwa yashyize ku mbuga nkoranyambaga Springsteen yavuze ko yanditse iyi ndirimbo ku wa gatandatu, "nyitunganya ejo nyisohora uyu munsi."

Yongeyeho ko ayituye abantu ba Minneapolis "abaturanyi be b'abimukira kandi ari ayituye Alex Pretti na Renee Good bishwe na ICE.