Mu gihe Uganda yegereje amatora abatavuga rumwe na leta bakomeje gutabwa muri yombi
Ahavuye isanamu, sarah Bereete
Polisi ya Uganda ibinyujije ku rubuga rwayo rwa X, hirya y'ejo ku wa kabiri yatangaje ko yataye muri yombi impirimbanyi mu by'uburenganzira bwa muntu Sarah Bireete ukunze kugaragara atanga ibitekerezo binenga Leta kuri televiziyo na radiyo zo muri Uganda.
Ibi bibaye mu gihe ubutegetsi bwa Perezida Yoweri Museveni bukomeje kongera igitutu ku batavuga rumwe na bwo n'abatavuga rumwe na politiki mbere y'amatora rusange ateganyijwe ku wa 15 Mutarama (1) 2026.
"Ari mu maboko ya polisi. Azashyikirizwa urukiko mu gihe gikwiye," niko Ubutumwa bwa polisi bwavugaga ariko ntibwasobanuye igihe azitaba urukiko cyangwa ibyaha aregwa.
Bireete, umunyamategeko akaba n'umuyobozi mukuru w'Ikigo gishinzwe Imiyoborere ishingiye ku Itegeko Nshinga (Centre for Constitutional Governance – CCG), akunze kunenga ibikorwa bitandukanye bya Leta, birimo ibyo abatavuga rumwe na Leta akanavuga ko ari ifungwa rinyuranyije n'amategeko n'iyicarubozo rikorerwa abayoboke babo.
Ikigo CCG nticyashoboye kuboneka ako kanya ngo gitange igitekerezo kuri iki kibazo.
Amatora yo muri Mutarama azahuza Perezida uri ku butegetsi, Museveni w'imyaka 81 uri ku butegetsi kuva mu 1986, n'umuhanzi w'icyamamare waje kuba umunyapolitiki, Bobi Wine.
Bobi Wine w'imyaka 43 n'ishyaka rye rya National Unity Platform na bo batangaza ko amagana y'abanyamuryango babo bafunzwe muri uyu mwaka, harimo no mu gihe cyo kwiyamamaza, bikavugwa ko ari uburyo bwo gutera ubwoba abayoboke be no guca intege ishyaka rye.
Mu kwezi gushize, Umuyobozi Mukuru w'Ishami ry'Umuryango w'Abibumbye rishinzwe Uburenganzira bwa Muntu, Volker Türk, na we yamaganye ibyo yise "kongera gukaza igitutu ku batavuga rumwe n'ubutegetsi" muri Uganda, avuga ko nibura abayoboke 550 b'Ishyaka National Unity Platform (NUP) bafunzwe muri uyu mwaka.
Undi munyapolitiki ukomeye utavuga rumwe n'ubutegetsi, Kizza Besigye, aracyari muri gereza hashize umwaka urenga afunzwe akurikiranyweho icyaha cy'ubugambanyi.
Na Bobi Wine ubwe yakubiswe n'inzego z'umutekano mu gihe yiyamamazaga mu majyaruguru y'igihugu, kandi nubwo polisi yasezeranyije gukora iperereza kuri ayo makuru y'ikoreshwa ry'ingufu z'umurengera, nta raporo irasohoka.
