Video: Nathalie Mukamazimpaka, umugore Bikiramariya yabonekeye 'akamutegeka' kutava i Kibeho

Mu bakobwa batatu Bikiramariya yabonekeye i Kibeho mu majyepfo y'u Rwanda nk'uko byemezwa na Kiliziya Gatolika, Nathalia Mukamazimpaka ntabwo yahavuye, kuko ari ko Bikiramariya yabimutegetse, nk'uko abivuga.

Uko atambutse kuri iyi mbuga ya Kibeho abantu bamwuzuraho, buri wese ashaka kumusuhuza, cyangwa kugira icyo amubaza, bamwe bashaka kumukoraho, n'abasaba kwifotozanya nawe.

Impamvu ni uko bemera ko yabonekewe kandi akavugana na Bikiramariya abakristu Gatolika bemera ko ariwe nyina wa Yezu, cyangwa nyina wa Jambo.

Amabonekerwa yabaye aha i Kibeho kuva mu 1981 kugeza mu 1989 yaje kwemezwa na Kiliziya Gatolika mu 2001, ko koko Bikiramariya yabonekeye Alphonsine Mumureke, Marie Claire Mukangango na Nathalie Mukamazimpaka.

Abafite ukwemera gutandukanye ibi barabikemanga. Ariko ababyemera bafata Mukamazimpaka utuye aha i Kibeho nk'umuntu udasanzwe 'waganiriye na nyina w'Imana'.

Marie Claire Mukangango yishwe mu gihe cya jenoside mu 1994, Alphonsine Mumureke ni umubikira uba hanze y'u Rwanda, naho Mukamazimpaka aba i Kibeho.

Mu kiganiro na BBC, Mukamazimpaka, yavuze uburyo yabonye Bikiramariya, ubutumwa yamuhaye, n'ibyo yamusabye.