Abunganira Béatrice Munyenyezi bavuga ko ubuhamya bwamushinje burimo ibinyoma

Mu Rwanda ku wa kane hakomeje urubanza rwa Béatrice Munyenyezi wajuririye igihano cy'igifungo cya burundu ku byaha yahamijwe bya jenoside no gusambanya abagore mu gihe cya jenoside mu 1994.

Abunganira Munyenyezi babwiye urukiko ko ubuhamya bwashyikirijwe n'ubushinjacyaha ku byaha Munyenyezi ashinjwa bwuzuye ibinyoma kandi ko ari ubuhamya bwivuguruza ndetse budafite ibimenyetso bifatika bigaragaraza ko Munyenyezi koko yakoze ibyaha.

Muri uru rubanza rw'ubujurire, abunganira Munyenyezi banenga bikomeye abatanze ubuhamya, umwe ku wundi bagaragaza ko abo batangabuhamya batari bazi neza Béatrice Munyenyezi.

Maître (Me) Bruce Bikotwa yavuze ko umutangabuhamya yashinje Munyenyezi ko yigaga muri kaminuza nyamara nyuma umushinjacyaha na we akaza kwivugira ko umutangabuhamya yamwitiranyije n'undi mukobwa babanaga wigaga muri kaminuza, gusa umushinjacyaha avuga ko uregwa yitwaraga nk'uwiga muri kaminuza.

Mu kwezi kwa kane umwaka ushize, Munyenyezi yahamwe n'ibyaha bya jenoside no gusambanya abakobwa n'abagore, akatirwa igihano cy'igifungo cya burundu ari na cyo yajuririye.

Iperereza ry'ubushinjacyaha ku gushaka kumenya niba koko Béatrice Munyenyezi yarize mu ishuri ryisumbuye rya CEFOTEC riri ahahoze umujyi wa Butare (ubu ni mu karere ka Huye), mu majyepfo y'u Rwanda, ryerekanye ko Munyenyezi atari ku rutonde rw'abize muri iryo shuri.

Abamwunganira banenze bivuye inyuma ibimenyetso byatanzwe n'ubushinjacyaha birimo fotokopi y'indangamanota buvuga ko ari iya Munyenyezi, ndetse n'urutonde rw'abize muri iryo shuri.

Me Bikotwa avuga ko ibyo bimenyetso atari umwimerere kuko "nta kashe y'ikigo n'umukono ('signature')" w'uwari umuyobozi wa CEFOTEC mu 1994 bigaragara kuri urwo rutonde rw'abahigaga.

Bikotwa yabwiye urukiko ko bo bafite umutangabuhamya w'umwarimu uvuga ko yigishije Munyenyezi isomo ryo gushushanya.

Mu bindi abunganira Munyenyezi banenga, ngo hari umutangabuhamya wavuze ko yiganye n'umugabo wa Munyenyezi, ari we Shalom Ntahobari, avuga ko bize mu "gifureri" (mu kigo cy'abafurere).

Me Bikotwa ati: "Ni gute umuntu wize atazi ko ishuri yizemo ryitwa Groupe Scolaire de Butare?" Yongeraho ati: "Bigaragara ko ibyo yavuze ari ibyo yabwiwe."

Ngo hari n'umutangabuhamya wavuze ko yitwaga "Kadogo" mbere ya jenoside. Me Félicien Gashema ati: "Gute se kandi? Ko twese tuzi ko ijambo Kadogo ryatangiye kuvugwa nyuma ya jenoside?"

Abatangabuhamya 12 bashinjura Béatrice Munyenyezi na 22 bamushinja ni bo bemejwe kuzatanga ubuhamya bwabo mu rukiko. Urubanza ruzakomeza mu kwezi kwa gatandatu.

Béatrice Munyenyezi yoherejwe n'Amerika muri Mata (4) mu mwaka wa 2021.