'Abunganira Munyenyezi bakurikiranwe' ku byo bavuze - Umushinjacyaha

Mu rubanza Beatrice Munyenyezi arimo kujuririra igihano cyo gufungwa burundu yakatiwe ku byaha bya jenoside, abashinjacyaha bwavuze ko batunguwe n'ibirimo kuvugwa n'abunganizi be, basaba ko bakurikiranwa.

Munyenyezi woherejwe na Leta Zunze za Amerika mu 2021 kuburanira mu Rwanda, ku wa kabiri, umwaka ushize yakatiwe gufungwa burundu ahamijwe uruhare mu kwica Abatutsi i Butare mu gihe cya jenoside mu 1994.

Ku wa kabiri mu rukiko i Nyanza, abashinjacyaha babwiye urukiko ko batunguwe no kumva abunganira Munyenyezi bavuga ko umubikira uvugwa mu rubanza ko yishwe muri jenoside ku mabwiriza ya Munyenyezi atabayeho, ko ari 'baringa'. Mu gihe ngo abatangabuhamye bemeje ko uwo mubikira yabayeho kandi yishwe.

Me Bruce Bikotwa na Félicien Gashema bunganira Munynyezi barimo gusobanura ubujurire bwa Munyenyezi bavuze ko umubikira uvugwa ko yishwe hatigeze hagaragazwa amazina n'umwirondorowe bye, bityo kuribo bakavuga ko uwo mubikira atigeze abaho.

Umushinjacyaha yavuze ko ibyo abunganizi ba Munyenyezi bavuga ari ugushinyagura nk'icyaha kijyanwa mu nkiko.

Gusa urukiko rwavuze ko kuba abo banyamategeko babona ko abavugwa ko bishwe na Munyenyezi batabayeho aribwo buryo bwabo bwo kuburana, ahubwo ko umushinjacyaha nawe agomba kugaragaza koko ko uwo mubikira yabayeho, ko uburyo bw'imiburanire ari uburenganzira bwa buri wese.

Mu bujurire, Munyenyezi n'abamwunganira bahakana ibyaha yahamijwe, bakavuga ko abatangabuhamya badahuza imvugo kandi ko ubuhamya bwabo budafite aho buhuriye n'ukuri.

Bashingira nk'aho bamwe mu batangabuhamye bavuga ko Munyenyezi yari umunyeshuri muri Kaminuza – mu gihe we n'abamwunganira bavuga ko yari atararangiza n'amashuri y'isumbuye- ikindi ngo ni uko yari atwite inda y'impanga mu gihe abatanze ubuhamya bavuga ko ibyo gutwita ntabyo babonaga.

Munyenyezi avuga ko azira umuryango yashatsemo, ko atagombye kubiryozwa kuko icyaha ari gatozi – Umugabo we Shalom Ntahobari na nyirabukwe Paulina Nyiramasuhuko wari Minisitiri w'umuryango mu gihe cya jenoside bombi bafungiye Arusha muri Tanzania ku byaha bya jenoside.

Umushinjacyaha yavuze ko ibyo Munyenyezi avuga atariko bimeze kuko abo mu muryango yashatsemo atari ko bose bafunze atanga urugero rwa sebukwe Ntahobari Maurice avuga ko atari no ku rutonde rw'abakurikiranwa ku byaha bya jenoside.

Urubanza ruracyakomeje.