Ethiopia na Tigray baritana ba mwana ku mirwano mishya

Kalkidan Yibeltal

BBC News, Addis Ababa

Leta ya Ethiopia yashinje abarwanyi bo muri Tigray gutangiza imirwano mishya ku mipaka y'ako karere ko mu majyaruguru.

Ibiro byo gutangaza amakuru bya leta ya Ethiopia bivuga ko abo barwanyi barenze ku gahenge ko gutuma hatangwa imfashanyo kari kariho guhera mu kwezi kwa gatatu.

Itangazo rya leta ya Ethiopia risohotse mu gihe aba Banya-Tigray bashinje leta ko mu gitondo cyo kuri uyu wa gatatu yabagabyeho ibitero mu birindiro byabo byo mu majyepfo, ivuye mu karere baturanye ka Amhara.

Uku gushinjanya kwerekana ko nyuma y'amezi y'agahenge, impande zombi ubu ziri mu mirwano.

Itangazo rya leta ya Ethiopia ryongeyeho ko igisirikare n'inzego zishinzwe umutekano barimo gusubiza "neza" ku bitero.

Hari ubwoba ko ibi birimo kuba bishobora guhuhura amakuba y'imibereho yibasiye iki gihugu cyo mu ihembe ry'Afurika kuva intambara yatangira mu kwezi kwa cumi na kumwe mu 2020.

Iyi ntambara imaze kwicirwamo abaturage b'abasivile babarirwa mu bihumbi za mirongo.