Trump avuga ko yiteguye guhana Uburusiya niba ibihugu bya OTAN biretse kugura ibitoro byabwo

Inyandiko gusa
Ifoto ya Perezida w'Amerika Donald Trump igaragaza intugu n'umutwe. Arareba muri 'camera', yambaye ikositimu y'ubururu, ishati y'umweru na karuvati itukura. Akoze ikimenyetso n'umunwa. Inyuma ye hari igitambaro kitagaragara neza cy'amabara y'umutuku n'umweru.

Ahavuye isanamu, Reuters

    • Umwanditsi, Rachel Muller-Heyndyk na Joe Inwood
    • Igikorwa, BBC News

Perezida w'Amerika Donald Trump yavuze ko yiteguye gufatira Uburusiya ibihano bikaze cyane ariko gusa igihe ibihugu byo mu muryango wo gutabarana w'Uburayi n'Amerika (OTAN/NATO) byaba byubahirije ibintu bimwe, birimo kureka kugura ibitoro by'Uburusiya.

Mu butumwa yatangaje ku rubuga nkoranyambaga rwe Truth Social, yavuze ko yiteguye "gufatira Uburusiya ibihano bikomeye" igihe ibihugu byo muri OTAN bizaba "byemeye, ndetse byatangiye, kubikora na byo".

Trump yakomeje gukangisha gufatira Uburusiya ingamba zikaze cyane ariko kugeza ubu yananiwe kugira ikintu na kimwe akora ubwo Uburusiya bwirengagizaga ibihe ntarengwa yagiye abushyiriraho, bukanirengagiza inkeke yagiye abushyiraho zo kubufatira ibihano.

Yavuze ko kugura ibitoro by'Uburusiya "bibabaje" ndetse yanatanze igitekerezo ko OTAN yashyiraho umusoro uri hagati ya 50% na 100% ku bicuruzwa byinjira muri uwo muryango bivuye mu Bushinwa, avuga ko ibyo byaca intege "igenzura rikomeye" bufite ku Burusiya.

Mu ibaruwa yise igenewe ibihugu byo muri OTAN, Trump yagize ati: "Niteguye 'gutangira' igihe muzaba mwiteguye [namwe]. Gusa mumbwire ni ryari?"

Yongeyeho ko "igurwa ry'ibitoro by'Uburusiya, biguzwe na bimwe [mu bihugu bya OTAN], rirababaje! Rica intege cyane uruhande rwanyu mu biganiro, n'ubushobozi bwo guciririkanya, ku Burusiya".

Trump yanavuze ko ihagarikwa ryo kugura ingufu (z'amashanyarazi) z'Uburusiya, hamwe n'imisoro myinshi ku Bushinwa, "byazavanwaho" nyuma y'intambara, "byafasha cyane" mu kurangiza intambara.

Uburayi bwagabanyije cyane gucungira ku ngufu z'Uburusiya kuva Uburusiya bugabye igitero gisesuye kuri Ukraine muri Gashyantare (2) mu mwaka wa 2022.

Skip Ibisomwa cane and continue reading
Ibisomwa cane

End of Ibisomwa cane

Mu mwaka wa 2022, umuryango w'Ubumwe bw'Uburayi (EU) waguze hafi 45% bya gaze (gas) yawo mu Burusiya. Muri uyu mwaka, biteganyijwe ko icyo kigero kigabanuka kikagera hafi kuri 13%, nubwo amagambo ya Trump yumvikanisha ko yumva uwo mubare udahagije.

Perezida w'Amerika yatanze ubwo butumwa ku wa gatandatu, mu gihe ubushyamirane bwiyongereye cyane hagati y'ibihugu byo muri OTAN n'Uburusiya, nyuma yuko indege nto z'intambara zitajyamo umupilote (drone) z'Uburusiya zirenga 10 zinjiye mu kirere cya Pologne (Poland) ku wa gatatu.

Pologne yavuze ko Uburusiya bwabikoze ku bushake ariko Uburusiya bwapfobeje ibyabaye ndetse buvuga ko "nta gahunda zo kurasa" ku bikorwa byo muri Pologne bufite.