Uburusiya burega Amerika uruhare rutaziguye mu ntambara ya Ukraine
Ahavuye isanamu, Getty Images
Uburusiya bwashinje Amerika ku nshuro ya mbere kugira uruhare rutaziguye mu ntambara yo muri Ukraine.
Umuvugizi wa minisiteri y'ingabo i Moscow avuga ko Leta Zunze Ubumwe za Amerika yemeza ibitero by'ingabo za Kyiv bitumbereye ahantu bikoreshejwe imbunda zo mu bwoko bwa Himars.
Liyetona Jenerali Igor Konashenkov yavuze ko ibiganiro bya telefoni hagati y'abayobozi ba Ukraine byumvirijwe byerekanye iyo sano. BBC ntiyashoboye kugenzura ibi ku buryo bwigenga.
Nta cyo abayobozi ba Amerika bavuze ku buryo bw'ako kanya kuri ibi birego. Uburusiya bwari bwabanje kurega Washington kurwana intambara mu buryo butaziguye muri Ukraine.
Bwana Konashenkov yagize ati: "Ni ubutegetsi bwa Biden bufite uruhare rutaziguye mu bitero bya rokete bikorwa na Kyiv byibasira uduce dutuwe n'ibikorwaremezo by'abasivile mu turere twa Donbas n'utundi turere twabayemo impfu nyinshi z'abasivile."
Himars ni ubwoko bw'intwaro irasa ibisasu bya roketi byinshi bishobora kurasa misile zidahusha ku hantu hagambiriwe kugera mu ntera y'ibilometero 70, kure kurenga aho intwaro za Ukraine zageraga mbere.
Binizerwa ko ziboneza kurusha intwaro Uburusiya bufite.
Mu kwezi kwa Kane, minisitiri w'ububanyi n'amahanga, Sergei Lavrov, yavuze ko icyemezo cya Perezida wa Leta Zunze Ubumwe za Amerika, Joe Biden, cyo guha Ukraine inkunga y'intwaro ibarirwa muri za miliyari z'amadolari bisobanuye ko "mu by'ukuri, Nato [umuryango w'ibihugu by'Uburayi na Amerika bikora ubutabazi bwa gisirikare], uri mu ntambara n'Uburusiya inyuze ku kindi gihugu kandi ko iri guha intwaro icyo gihugu".
Bwana Lavrov w'imyaka 72 yaburiye ati: "Intambara isobanuye intambara".
Mu gihe cy'intambara muri Ukraine, Uburusiya bwamye bushinjwa ibyaha byinshi by'intambara n'ibyaha byibasira inyokomuntu.
Mu cyumweru gishize, Ukraine yashinje Moscow kurasa kuri gereza mu gace ka Donetsk gashaka kwitandukanya na Ukraine mu rwego rwo guhishira ibirego by'iyicarubozo.
Kandi BBC yabonye ibimenyetso by'ibirego by'iyicarubozo n'ikubitwa ry'abafungwa ba Ukraine bikozwe n'ingabo hamwe n'inzego z'umutekano z'Uburusita.
