Uko iki gifi cya rutura cyakoze urugendo 'rwaciye agahigo' kikava muri Colombia kikagera muri Zanzibar

Igifi rutura cyo mu bwoko bwa 'humpback' cyakoze rumwe mu ngengo ndende cyane kandi zidasanzwe zamenyekanye, inzobere zikeka ko uko kwimuka kwaba kwaratewe n'impamvu zirimo kwororoka.

Iki gifi cy'ikigabo cyabonetse ku nkengero z'inyanja ya Pasifika ku mwaro wa Colombia mu 2013, maze nyuma mu 2017 kiboneka ahantu nkaho mu nyanja hafi ya Zanzibari muri Tanzania, ku ntera ya 13,000 km.

Inzobere zitekereza ko uru rugendo rudasanzwe rwaba rwaratewe n'impamvu zirimo ihindagurika ry'ikirere ririmo kugabanya ibyo bene aya mafi arya, cyangwa se urugendo rwo gushaka 'umukunzi'.

Ekaterina Kalashnikova wo muri 'Tanzania Cetaceans Program' avuga ko uru rugendo "rwari rutangaje cyane kandi rudasanzwe yewe no kuri ubu bwoko bw'amafi bukunda kwimuka".

Iyi foto yo mu 2022 irerekane iyi fi iri hafi y'umwaro wa Zanzibar.

Dr Ekaterina avuga ko bishoboka cyane ko iyi ari yo ntera ndende cyane babashije kwandika yakozwe n'ifi ya 'humpback'.

Ekaterina Kalashnikova

Ifi za humpback ziba mu nyanja zose zo ku isi. Zikora ingendo ndende buri mwaka kurusha ayandi mafi, zikava mu mazi yo ku mirongo miganda (tropicals) aho zororokera, zikerekeza mu yandi mazi yo ku mpera zo hejuru no hepfo z'isi aho zibonamo ibyo kurya.

Ariko urugendo rw'iyi fi y'ingabo rwo rwari rutangaje cyane kuko yarenze ahantu habiri zisanzwe zijya gushaka ingore ngo zororoke.

Igitekerezo kimwe ni uko ihindagurika ry'ikirere ririmo kugabanya udusimba duto two mu nyanja dutunga ibi bifi bya 'humpback', bigatuma bikora ingendo bikajya gushakira ahandi.

Ikindi gitekerezo ni uko aya mafi yo mu bwoko bwa 'whales' yaba arimo gushakisha ahandi ho kororokera.

Dr Ekaterina agira ati: "Nubwo impamvu nyayo itazwi neza, mu mpamvu hashobora kuba harimo ihindagurika ry'ikirere ritera ibihe bikabije kuba bibi, hamwe n'ubundi buryo bwo kwororoka kuri ubu bwoko [bw'amafi]".

Iyo fi rutura iri mu itsinda ry'amafi ya 'humpback' yafotowe n'ubwato bw'ubushakashatsi mu nyanja ya Pasifika ku mwaro wa Colombia mu 2013.

Kongera kubona iyo fi bakayimenya iri ku ntera ya 13,046 km iri hagati y'aho yabonetse mbere n'aho yabonetse nyuma byatangaje abahanga bavuga ko ari urugendo rudasanzwe.

Kubera ko isi ari umubumbe, inzira ngufi hagati y'ahantu runaka n'ahandi ishushanywa nk'uruziga, ikamera nk'umurongo w'igice cy'uruziga uhuza ahantu habiri kuri uyu mubumbe, bityo iyi fi ikaba ishobora kuba yarakoze intera isumba ziriya kilometero ziri hagati ya Colombia na Zanzibar.

Abashakashatsi basohoye inyandiko y'ibyo babonye kuri iyi fi bashingiye ku mafoto ibihumbi y'amafi ya 'whales' yafotowe n'abashakashatsi, abakurikirana bene aya mafi, hamwe n'amakuru yo ku rubuga rwa happywhale.com.

Amakuru yabo yifashisha 'artificial intelligence' mu guhuza ishusho bwite hamwe n'imirizo y'aya mafi maze bagakurikirana ingendo zayo ku isi.

Iby'ubu bushakashatsi byatangajwe muri journal, Royal Society Open Science.