OMS yatangaje ko ikiza cya Ebola cyadutse muri DRC na Uganda ari ikibazo cyihutirwa gihangayikishije isi

Ishami ry'Umuryango w'Abibumbye ryita ku buzima (OMS/WHO) ryatangaje ko ikiza cya Ebola cyadutse muri Repubulika ya Demokarasi ya Congo (DRC) no muri Uganda ari ikibazo cy'ubuzima rusange cyihutirwa gihangayikishije isi, nyuma yuko hatangajwe umuntu wa mbere wishwe na Ebola hanze ya DRC.

Ku wa gatanu, byamenyekanye ko umurwayi wapfiriye muri Uganda bari bamusanzemo Ebola.

OMS yaburiye ko nubwo iki kiza kitaraba icyorezo, hari ibyago byinshi ko gikwirakwira hakurya y'imipaka kubera urujya n'uruza rw'abaturage n'inzira ziri hagati y'ibihugu byo mu karere.

Benshi mu bishwe na Ebola babonetse mu turere dutatu tw'ubuvuzi mu ntara ya Ituri mu majyaruguru ashyira uburasirazuba bwa DRC. Ariko umuntu umwe yemejwe ko yishwe na Ebola mu murwa mukuru Kinshasa, bicyekwa ko yari umurwayi wari usubiye i Kinshasa avuye mu ntara ya Ituri.

Nta nkingo zemewe ziriho cyangwa umuti wemewe w'iyi Ebola yo mu bwoko bwa Bundibugyo yo muri iki kiza cyadutse ku nshuro ya 17 muri DRC. OMS ivuga ko muri rusange Ebola yica ku kigero cya 50%.

Ikwirakwira iyo habayeho guhura kw'amatembabuzi yo mu mubiri ndetse binyuze no mu mubiri wakomeretse cyangwa wakatitse, igateza kuva amaraso cyane ndetse n'ingingo z'umubiri zikananirwa gukora.

Ibimenyetso by'ibanze bya virusi ya Ebola birimo nko guhinda umuriro, kubabara imitsi, kugira umunaniro, kuribwa umutwe no kubabara mu muhogo, ndetse bikurikirwa no kuruka, gucibwamo (guhitwa), gusesa ibiheri no kuva amaraso.

Dr Jean Kaseya uyobora ikigo cy'Afurika cyo kurwanya no gukumira indwara (Africa CDC), yavuze ko amakuru yakusanyijwe kugeza ku itariki ya 15 Gicurasi (5) uyu mwaka agaragaza ko kuri ubu DRC irimo gusuzuma abantu 336 bacyekwa ko banduye Ebola.

Abantu 87 bamaze kwemezwa ko bishwe na Ebola mu turere (zone) dutatu tw'ubuvuzi two mu ntara ya Ituri: akarere k'ubuvuzi ka Mongwalu kapfuyemo abantu 57, akarere k'ubuvuzi ka Rwampara gapfamo abantu 27, mu gihe akarere k'ubuvuzi ka Bunia – umurwa mukuru w'intara ya Ituri – kapfuyemo abantu batatu.

Dr Kaseya yongeyeho ko ibipimo 13 byemejwe ko birimo virusi ya Ebola yo mu bwoko bwa Bundibugyo.