Christian Atsu 'yakuwe mu byasenyutse afite ibikomere' nyuma y'umutingito
Ahavuye isanamu, Getty Images
Umukinnyi w'umupira w'amaguru w'Umunya-Ghana Christian Atsu yakuwe mu bisigazwa by'inyubako yasenyutse "afite ibikomere", nyuma y'imitingito muri Turukiya, nkuko Mustafa Özat, visi perezida w'ikipe akinira, yabibwiye radio yo muri Turukiya.
Atsu, ukinira ikipe ya Hatayspor, yari yaheze muri ibyo bisigazwa by'inyubako nyuma y'imitingito yishe abantu barenga 5,000.
Uyu wahoze ari rutahizamu w'ikipe y'igihugu ya Ghana, w'imyaka 31, yakiniye Newcastle yo mu Bwongereza imikino 107, ndetse yanakinnye muri Chelsea, Everton na Bournemouth.
Taner Savut, umuyobozi ushinzwe siporo mu ikipe ya Hatayspor, aracyari muri iyo nyubako yahirimye.
Agace ka Hatay ni kamwe mu duce twari twegereye cyane izingiro ry'umutingito, ndetse karangiritse bikomeye.
Özat yabwiye Radyo Gol ati: "Christian Atsu yakuwe mu byasenyutse afite ibikomere.
"Birababaje ko umuyobozi wa siporo wacu Taner Savut akiri mu byasenyutse.
"Hatay yarashegeshwe bikomeye. Turimo kugera ku musoza w'amasaha ya mbere mabi cyane [abayeho]".
Atsu, wakiniye Ghana imikino 65, yageze mu ikipe ya Hatayspor mu kwezi kwa cyenda mu 2022, nyuma yo gukina umwaka umwe mu ikipe ya Al-Raed yo muri Arabie Saoudite (Saudi Arabia).
Yatsinze igitego cy'intsinzi ku munota wa 90 mu mukino wa shampiyona y'icyiciro cya mbere muri Turukiya (izwi nka Süper Lig) Hatayspor yakinnye na Kasimpasa ku cyumweru, warangiye ari igitego 1-0.
Ishyirahamwe ry'umupira w'amaguru muri Ghana ryanditse kuri Twitter riti: "Twakiriye amakuru meza ko Christian Atsu yatabawe agakurwa neza mu bisigazwa by'inyubako yahirimye kandi ko arimo kuvurwa. Mureke dukomeze gusengera Christian".
