DR Congo: 'Nibaza kudutera tuzirwanaho' – umuvugizi wa M23

Umuvugizi w'umutwe w'inyeshyamba wa M23 avuga ko witeguye kwirwanaho mu gihe waba ugabweho igitero n'ingabo za leta ya Repubulika ya Demokarasi ya Congo (FARDC).

Mu itangazo M23 yasohoye ku wa gatatu, ivuga ko ihuriro rya FARDC n'imitwe yitwaje intwaro irimo nka FDLR ryamaze gusoza ibikorwa ryatangiye mu minsi ishize byo kwitegura gutangiza intambara kuri M23.

FARDC na FDLR bahakana kugirana imikoranire.

Mu kiganiro na BBC Gahuzamiryango kuri uyu wa kane, umuvugizi wa M23 Major Willy Ngoma yagize ati: "Tugiye kuguma aho turi dutegereje ko amasezerano twagiranye [na leta] ashyirwa mu bikorwa... Niba bashaka kongera kubyutsa ibiganiro, turiteguye.

"Hashize imyaka 10 dutegereje ko amasezerano ashyirwa mu bikorwa... Ariko nibaza kudutera nanone, tuzirwanaho".

Itangazo rya M23 rivuga ko ibindi bikoresho n'abandi basirikare ba leta boherejwe ku rugamba "mu kongerera imbaraga ihuriro", ubu bakaba bitegeye ibirindiro by'uyu mutwe.

BBC Gahuzamiryango yagerageje kuvugana na Général de brigade Sylvain Ekenge, umuvugizi wa gisirikare muri Kivu ya Ruguru, kuri ibi bivugwa na M23, kugeza ubu ntibirashoboka.

Leta ya Congo ifata M23 nk'"umutwe w'iterabwoba", wo ukavuga ko ibyo nta cyo bivuze kuri wo.

Kuva mu kwezi kwa gatandatu, umutwe wa M23 wigaruriye ibice bimwe byo mu ntara ya Kivu ya Ruguru birimo n'umujyi wa Bunagaga uri ku mupaka na Uganda.

Leta ya Congo ishinja leta y'u Rwanda guha ubufasha umutwe wa M23, ibyo u Rwanda na M23 bahakana.

Mu biganiro byo mu murwa mukuru Luanda wa Angola byo ku itariki ya 6 y'uku kwezi kwa karindwi byo guhosha ubushyamirane hagati y'ibihugu byombi, Perezida wa Congo Félix Tshisekedi na Perezida w'u Rwanda Paul Kagame bemeranyijwe ku nzira yo gukurikiza.

Ku buhuza bwa Perezida wa Angola João Lourenço, biyemeje kubyutsa umubano w'ibihugu byombi, banavuga ko imirwano ihagarara na M23 ikava mu birindiro byayo ako kanya, nkuko byemejwe n'inama y'abakuru b'ibihugu byo mu muryango w'Afurika y'uburasirazuba (EAC) mu nama y'i Nairobi.

I Luanda kandi bemeje "gutsinda" FDLR n'indi mitwe ishamikiye kuri uyu mutwe, no kwihutisha ishyirwa mu bikorwa rya gahunda yo gusubiza mu buzima busanzwe abahoze ari abarwanyi.

Mu kwezi kwa gatandatu, abakuru b'ibihugu bo muri EAC bateraniye i Nairobi muri Kenya, bemeranya kohereza mu burasirazuba bwa Congo umutwe w'ingabo z'akarere wo kurwanyayo imitwe yitwaje intwaro. Congo yavuze ko abasirikare b'u Rwanda badakwiye kuba muri uwo mutwe.

Imirwano yongeye kubura mu mpera y'ukwezi kwa gatatu uyu mwaka hagati ya FARDC na M23 muri Kivu ya Ruguru, nyuma y'imyaka hafi 10 yari ishize nta bitero bikomeye uyu mutwe ukora.

Buri ruhande rushinja urundi gutangiza imirwano.

Umuryango w'abibumbye (ONU/UN) uvuga ko abaturage barenga 170,000 bamaze guhunga imirwano.