Aliou Diarra na Jean-Jacques Boissy bakinaga mu Rwanda batoranyijwe n'amakipe ya NBA G League

Aliou Diarra, Umunya-Mali wakiniraga ikipe ya APR Basketball Club yo mu Rwanda,yatoranyijwe ku mwanya wa mbere n'ikipe ya Texas Legends ngo azayikinire muri shampiyona ya Basketball izwi nka NBA G League muri Amerika.

Ku mwanya wa gatanu muri uko gutoranya abakinnyi, ikipe ya Memphis Hustle yatoranyije Umunya-Senegal Jean Jacques Boissy wari uherutse gutangira gukinira ikipe ya REG Basketball Club yo mu Rwanda, waciye kandi no mu ikipe ya Urunani mu Burundi.

Aba babiri batoranyijwe muri 'NBA G League International Draft' yaraye ibaye, mu bakinnyi 17 gusa bo mu mahanga bagiye kwinjira muri NBA G League – irushanwa rifatwa nk'irikurikiraho nyuma y'iryamamaye ku isi rya NBA.

Muri abo 17, undi munyafurika watoranyijwe ni Emmanuel Beya wo muri DR Congo ufite ubwenegihugu bw'Ubusuwisi ari naho yari amaze igihe akinira. Uyu yatoranyijwe n'ikipe ya Rip City Remix nyuma y'uko abuze ikipe imutoranya muri 'NBA Draft' yabaye mu kwezi gushize.

Diarra na Boissy 'abakinnyi batangaje'

Aba bakinnyi kuri ubu bafatwa nka bamwe mu barusha abandi ubuhanga muri Basketball muri Afurika.

Boissy ni we MVP (Most Valuable Player) w'irushanwa rihuza amakipe (clubs) yabaye aya mbere mu bihugu byayo muri Afurika BAL (Basketball Africa League) ryarangiye mu kwezi gushize i Pretoria muri Afurika y'Epfo.

NahoDiarra ni umwe mu bakinnyi bashimishije abantu benshi muri iryo rushanwa kubera ubuhanga bwe mu gutsinda atera ibyitwa 'dunks', by'umwihariko no kugarira akora za 'blocks', iryo rushanwa rirangiye yahawe igihembo cya 'Dikembe Mutombo Defensive Player of the Year' kubera ubuhanga mu kugarira.

Avuga kuri aba bakinnyi bombi ubwo BAL yari ishojwe, Amadou Gallo Fall ukuriye iryo rushanwa yavuze ko bombi ari "abakinnyi batangaje" bari mu beza Afurika ifite muri uyu mwaka, kubera uburyo bigaragaje muri uyu mwaka.

Boissy yatangiye gukina Basketball ku myaka 15

Kimwe n'abandi bana babyiruka muri Senegal, umukino wa mbere bagerageza ni Football, umukino iki gihugu kizwiho, Boissy na we ntiyari atandukanye n'abandi, nk'uko yagiye abitangaza. Ni wo mukino yahereyeho.

Ariko ntibyatinze kuko umubyeyi we [se] Elysée Boissy, wakiniye ikipe y'igihugu ya Senegal ya Basketball, yahise atangira kumwinjiza muri uyu mukino ku myaka 15, nk'uko abivuga.

Nyuma yo kurangiza amashuri yisumbuye, mu 2019 yakomereje kaminuza mu ishuri rya African Leadership University mu ishami riri mu Rwanda, aho yiga yanakiniyeho amakipe ya Patriots BBC na United Generations Basketball (UGB) muri shampiyona yo mu Rwanda.

Arangije kwiga yasubiye iwabo, nyuma yerekeza mu ikipe ya CB Cornella yo mu cyiciro cya gatatu muri Espagne, mbere y'uko impano ye iboneka neza ubwo yakiniraga AS Douanes yo muri Senegalmuri BAL ya 2023 aho yabaye MVP nubwo ikipe ye yatsinzwe ku mukino wa nyuma na Al Ahly.

Umwaka ushize Boissy yagiye mu ikipe y'Urunani mu Burundi ayifasha gutwara shampiyona itsinze mukeba ukomeye Dynamo, ayigeza mu mikino ya 'conferences' [ni nk'amatsinda hagendewe ku turere twa Afurika] yo guhatanira kujya mu mikino ya nyuma ya BAL.

Boissy ari kumwe n'Urunani, imikino ya 'conference' yabereye i Nairobi ntiyabahiriye, kuko bavuyemo, ariko we ku giti cye yigaragaje nk'umukinnyi mwiza. Nibwo yahise asinyira ikipe ya Al Ahli Tripoli yo mu yindi 'conference' ya Afurika ya ruguru yari yarabonye umwanya wo gukina imikino ya nyuma ya BAL y'uyu mwaka muri Afurika y'Epfo.

Boissy w'imyaka 25, yafashije Al Ahli Tripoli gutwara igikombe, muri rusange atsinda amanota hafi 19 kuri buri mukino mu mikino 10 kugeza ku wa nyuma batsinzemo Petro de Luanda yo muri Angola, akarangiza ari MVP.

Mbere y'uko shampiyona ya NBA nkuru na NBA G-League zitangira, mu bakinnyi baba barimo kugeragezwa, Boissy azakinira ikipe ya Milwaukee Bucks mu irushanwa ry'igihe gito rya NBA Summer League rizatangira ejo ku wa kane.

Aliou Diarra na Cooper Flagg: Ba nimero ya mbere hamwe

Nyuma y'uko Dallas Mavericks mu kwezi gushize itoranyije Cooper Flagg w'imyaka 18 ku mwanya wa mbere muri 'NBA Draft', muri iri rushanwa rya NBA Summer League izanakinisha Aliou Diarra na we waraye atoranyijwe nka nimero ya mbere muri 'NBA G League International Draft' yaraye ibaye.

Aliou Fadiala Diarra w'imyaka 23 ureshya na metero 2.8, yazamukiye mu ikipe ya Stade Malien y'iwabo i Bamako muri Mali, ntiyatinda kwigaragaza nk'umukinnyi mwiza mu kugarira.

Mu mikino ya BAL kuva mu 2023 ari kumwe na Stade Malien, mu 2024 ari kumwe na FUS Rabat yo muri Maroc, no muri uyu mwaka ari kumwe na APR BBC yo mu Rwanda, Diarra aza mu ikipe ya mbere y'abahanga mu kugarira muri iri rushanwa rya BAL.

Muri BAL y'uyu mwaka gusa Diarra yatsindaga ikigereranyo cy'amanota 17 ku mukino, agakora 'rebounds' 11 ku mukino, na 'blocks' eshatu.

Muri BAL y'uyu mwaka, tariki 25 Gicurasi(5) 2025, yaciye umuhigo wo gukora 'blocks' nyinshi ku mukino, umunani, ubwo APR yakinaga na Nairobi City Thunders i Pretoria, akuraho umuhigo wari ufitwe na Anas Mahmoud na Khaman Maluach.

Nubwo Diarra ubu yatoranyijwe na Texas Legends, byitezwe ko guhera ejo ashobora kuboneka akinana na Cooper Flagg mu ikipe ya Dallas Mavericks ya NBA mu irushanwa rito ryo gusuzuma abakinnyi rya NBA Summer League.

Nubwo hakiri urugendo kugira ngo aba bakinnyi beza ba Afurika, Aliou Diarra na Jean Jacques Boissy, binjire muri shampiyona ya NBA, kwinjira muri NBA G League ni ukwegera umuryango wabinjiza muri iyo shampiyona ya Basketball ikurikiranwa cyane ku isi.