Uburakari muri Zimbabwe nyuma yuko Perezida ashyize umuhungu we muri guverinoma
Ahavuye isanamu, EPA
Perezida wa Zimbabwe Emmerson Mnangagwa yashinjwe icyenewabo kubera gushyira umuhungu we mu bagize guverinoma nshya, nyuma yuko yongeye gutorwa nka Perezida mu kwezi gushize, mu matora yateje impaka.
Ku wa mbere, Mnangagwa yagize umuhungu we David Kudakwashe Minisitiri wungirije w'imari, bijyanye na gahunda y'inteko ishingamategeko yo kongera umubare (quota) w'urubyiruko mu butegetsi.
Ibitangazamakuru byo muri Zimbabwe byatangaje ko yanagize mwishywa we, Tongai Mnangagwa, Minisitiri wungirije w'ubukerarugendo.
Mthuli Ncube, wahoze akora muri banki y'Afurika y'iterambere, yagumishijwe ku mwanya wa Minisitiri w'imari.
Oppah Muchinguri-Kashiri, umuyobozi ku rwego rw'igihugu w'ishyaka ZANU–PF riri ku butegetsi, yongeye kugirwa Minisitiri w'ingabo.
Fadzayi Mahere, Depite uvuga ashize amanga wo mu ishyaka rikomeye ritavuga rumwe n'ubutegetsi rya CCC (Citizens Coalition for Change), yavuze ko iyi guverinoma nshya "nta cyo yabona cyo kwireguza [kwisobanura]", anashinja Mnangagwa kwenyegeza icyenewabo.
Ahavuye isanamu, David Kudakwashe Mnangagwa
Ku mbuga nkoranyambaga, bamwe bavuze ko bababajwe no kuba Perezida yashyize umuhungu we muri uwo mwanya.
Nta cyo ishyaka ZANU–PF cyangwa ibiro bya perezida bari batangaza kuri icyo bashinjwa. Ariko abashyigikiye Mnangagwa bavuga ko umuhungu we yujuje ibisabwa kuri uwo mwanya.
Kongera gutorwa kwa Mnangagwa kwamaganwe n'abatavuga rumwe n'ubutegetsi, bavuga ko amatora yabayemo uburiganya, mu gihe zimwe mu ndorerezi zavuze ko ayo matora atagejeje ku kigero cyo kwizerwa cyo mu karere no ku rwego mpuzamahanga.
