Israel yarashe kuri televiziyo y'igihugu ya Irani irimo gutangaza amakuru

Indege z'intambara za Israel zarashe ku cyicaro gikuru cy'igitangazamakuru cya leta ya Irani mu murwa mukuru Tehran, nyuma yuko igisirikare cya Israel gisabye abatuye muri ako gace aho icyo gitangazamakuru kiri, kwimuka.

Amakuru yari arimo gutangazwa mu buryo bw'ako kanya kuri televiziyo ya Irani yahagaze by'akanya gato nyuma yuko humvikanye ibiturika ndetse n'amatara akazima.

Ibitangazamakuru byo muri Irani byatangaje ko umukozi nibura umwe w'icyo gitangazamakuru cya leta yapfuye.

Igisirikare cya Israel cyavuze ko cyarashe "ikigo cyo gutangaza amakuru cy'ubutegetsi bwa Irani".

Minisiteri y'ububanyi n'amahanga ya Irani yavuze ko icyo gitero ari "icyaha cyo mu ntambara".

Hagati aho, abaturage b'i Tehran bagaragaye barimo guhunga ku bwinshi, amafoto agaragaza umubyigano w'imodoka mu muhanda munini ujya mu majyaruguru.

Mbere, igisirikare cya Israel cyatangaje ko cyageze ku "kurusha imbaraga mu kirere byuzuye" kuri uwo mujyi ndetse ko cyashenye kimwe cya gatatu (1/3) cy'ibyuma bya Irani bikoreshwa mu kurasa (kohereza) ibisasu bya misile.

Ibyo byabaye nyuma yuko misile za Irani zirashe mu duce tune tunyuranye mu majyaruguru no rwagati muri Israel mu ijoro rishyira ku wa mbere, zica abasivile nibura umunani, nkuko igisirikare cya Israel kibivuga.

Minisiteri y'ubuzima ya Irani yavuze ko abantu nibura 224 bishwe naho abandi barenga 1,200 barakomereka mu bitero byo mu kirere bya Israel byo guhera ku wa gatanu, ubwo Israel yatangiraga ibitero bisesuye byomu kirere byo kwibasira gahunda ya nikleyeri ya Irani hamwe na misile zayo zo mu bwoko bwa 'ballistic'.

Ibiro bya minisitiri w'intebe wa Israel byatangaje ko ibitero bya misile bya Irani byishe abantu nibura 24 ndetse bikomeretsa abandi 592 muri Israel muri icyo gihe cyo guhera ku wa gatanu.

Ku wa mbere nyuma ya saa sita z'amanywa, umuvugizi w'igisirikare cya Israel mu rurimi rw'Igiperise ('perse') yasabye abatuye mu karere ka 3 k'i Tehran mu gice cy'uburengerazuba, kwimuka ako kanya, avuga ko icyo gisirikare cyateganyaga kurasa ku bikorwa-remezo bya gisirikare ndetse ko ubuzima bwabo bwari buri mu kaga.

Hashize amasaha, igitero cya Israel ku nyubako ikoreramo igitangazamakuru cya leta ya Irani cyatangajwe mu buryo bw'ako kanya kirimo kuba, kuri televiziyo y'icyo gitangazamakuru, yitwa IRINN.

Nyuma yuko humvikanye ibiturika byinshi, Sahar Emami wari urimo kuvuga amakuru yagize ati: "Ibyo mwabonye ni ijwi ry'ubushotoranyi bugaragara bw'ubutegetsi bw'Abanyasiyoni [Abanya-Israel] kuri IRIB."

Ikindi giturika, cyaturitse cyane kurushaho, cyajegeje 'studio' y'icyo gitangazamakuru, bituma Emami ahava.

Ayo makuru yarahagaze asimbuzwa amakuru y'incamake, nuko hashize iminota amakuru arasubukurwa.

Nyuma yaho, Peyman Jebelli, umukuru w'igitangazamakuru IRIB cya leta ya Irani, yagaragaye kuri televiziyo yerekana urupapuro ruriho amaraso. Yavuze ko iyo televiziyo n'abakozi bayo bashikamye "kugeza ku musozo".

Ibiro ntaramakuru Fars byo muri Irani byatangaje ko Masoumeh Azimi, umukozi wo mu bunyamabanga rwa IRIB, yiciwe muri icyo gitero.

Umuvugizi wa minisiteri y'ububanyi n'amahanga ya Irani, Esmaeil Baqaei, yamaganye icyo gitero, avuga ko ari "igikorwa cy'ububisha" ndetse ko ari "icyaha cyo mu ntambara".

Umuvugizi w'igisirikare cya Israel, Brigadiye Jenerali (Brig Gen) Effie Defrin, yavuze ko cyarashe "ikigo cyo gutangaza amakuru cy'ubutegetsi bwa Irani, cyakoreraga ingabo za Irani".

Yagize ati: "Dushingiye ku makuru yacu y'ubutasi, icyo kigo cyakoreshwaga n'igisirikare mu gukora cyikinze [cyihishe] mu basivile no mu bikorwa-remezo bya gisivile."

Minisitiri w'ingabo za Israel, Israel Katz, yavuze ko IRIB ari "urwego rutangaza icengezamatwara no kugomesha rw'ubutegetsi bwa Irani".