Israel ivuga ko yatoye imirambo itandatu muri Gaza y'abari barashimuswe

Israel ivuga ko abasirikare bayo batoye imirambo itandatu y'abashimuswe bari bafunzwe na Hamas muri Gaza.

Mu itangazo, ingabo za Israel (IDF) zavuze ko iyo mirambo yatahuwe ku wa gatandatu mu muyoboro wo munsi y'ubutaka wo mu gace ka Rafah.

IDF yatangaje amazina y'abo bari barashimuswe, ivuga ko ari Carmel Gat, Eden Yerushalmi, Hersh Goldberg-Polin, Alexander Lobanov, Almog Sarusi na Master Sgt Ori Danino.

Umuvugizi wa IDF Rear Adm Daniel Hagari yavuze ko igenzura ry'ibanze rigaragaza ko "bishwe mu bugome n'abaterabwoba ba Hamas mbere gato yuko tubageraho".

Minisitiri w'intebe wa Israel Benjamin Netanyahu yavuze ko Israel itazaruhuka kugeza ababishe bagejejwe mu butabera.

Mu itangazo, yanavuze ko leta ye ishishikajwe no kugera ku masezerano yo kurekura abasigaye bashimuswe kandi arinda umutekano w'igihugu.

Yongeyeho ati: "Uwo ari we wese wica abashimuswe - ntashaka amasezerano."

Itsinda rihagarariye imiryango ifite abayo bashimuswe bafungiye muri Gaza ryasabye Minisitiri w'intebe Netanyahu "kugeza ijambo ku gihugu no kwirengera gutererana abashimuswe".

Iryo tsinda, ryitwa 'Hostages Families Forum', ryavuze ko abo bose batandatu bari barashimuswe "bishwe mu minsi micye ishize, nyuma yo kurokoka amezi hafi 11 y'ihohoterwa, iyicarubozo, no kwicishwa inzara aho bari bafungiwe na Hamas".

Mu itangazo, iryo tsinda ryongeyeho riti: "Gutinda gushyira umukono ku masezerano byagejeje ku mpfu zabo no ku z'abandi benshi bashimuswe."

Iryo tsinda ryanatangaje gahunda yo "guhagarika ubuzima mu gihugu" kuri iki cyumweru, risaba abaturage ba Israel kwitabira imyigaragambyo mu mijyi nka Yeruzalemu, Tel Aviv n'ahandi muri Israel, mu gusaba ko amasezerano yo guhanahana imbohe agerwaho.

Umugabo w'Umwarabu wo mu bwoko bw'aba Bedouin watabawe n'ingabo za Israel agakurwa muri Gaza muri iki cyumweru gishize, yashishikarije Israel kugera ku masezerano na Hamas kugira ngo abashimuswe bose basigaye barekurwe.

Nyuma yuko ku wa gatatu asubiye mu cyaro atuyemo cyo mu majyepfo ya Israel, Kaid Farhan Elkadi yavuze ko ibyishimo bye bituzuye igihe cyose hakiri imfungwa ku mpande zombi.

Mu itangazo ryo mu gitondo cyo kuri iki cyumweru ritangaza izo mpfu, IDF yavuze ko iyo mirambo "yasubijwe ku butaka bwa Israel".

"Bose bashimuswe ku itariki ya 7 Ukwakira [10] [mu 2023] ndetse biciwe muri Gaza n'umuryango w'iterabwoba wa Hamas."

Iryo tangazo ryongeyeho ko imiryango yabo yamaze kubimenyeshwa.

Perezida wa Israel Isaac Herzog yavuze ko "umutima w'igihugu cyose uramenaguritse uhinduka ubushingwe kubera inkuru" y'iyicwa ryabo.

Yongeyeho ati: "Mu izina rya Leta ya Israel, mpobeye imiryango yabo n'umutima wanjye wose, kandi nsabye imbabazi kubera kunanirwa kubazana mu rugo batekanye."

Hagati aho, nyuma yuko urupfu rwa Goldberg-Polin – Umunyamerika – rwemejwe, Perezida w'Amerika Joe Biden yavuze ko ababajwe cyane ndetse arakajwe cyane n'iyo nkuru.

Yasohoye itangazo avuga ko "Hersh yari umwe mu nzirakarengane zagabweho igitero mu bugome ubwo zari zitabiriye iserukiramuco ry'umuziki rigamije amahoro ryo muri Israel ku itariki ya 7 Ukwakira".

"Yatakaje ukuboko kwe arimo gufasha inshuti n'abantu atazi mu gihe habaga ubwicanyi bwibasiye imbaga bwa kinyamaswa bwa Hamas. Ni bwo yari acyuzuza imyaka 23. Yateganyaga gutembera isi.

"Namenyanye n'ababyeyi be, Jon na Rachel. Bagize ubutwari, ubushishozi n'ubudacogora, nubwo bihanganiye ibyo umuntu adashobora kwiyumvisha."

Igisirikare cya Israel cyagabye igitero muri Gaza cyo gusenya Hamas, mu gusubiza ku gitero kitari cyarigeze kibaho mbere Hamas yagabye mu majyepfo ya Israel ku itariki ya 7 Ukwakira, cyiciwemo abantu bagera hafi ku 1,200, naho abandi 251 barashimutwa.

Abantu barenga 40,530 bamaze kwicirwa muri Gaza kuva icyo gihe, nkuko bitangazwa na minisiteri y'ubuzima ya Gaza itegekwa na Hamas.

Abahuza bo muri Amerika, Misiri na Qatar barimo kugerageza gutuma habaho amasezerano y'agahenge, yatuma Hamas irekura abashimuswe 97 igifunze, barimo nibura 27 bifatwa ko bapfuye, na yo igahabwa imfungwa z'Abanye-Palestine zifungiye mu magereza yo muri Israel.

Bibaye mu gihe igikorwa kiyobowe n'Umuryango w'Abibumbye kizamara iminsi cyo gukingira imbasa cyatangiye muri Gaza, nyuma yuko kuri iyi mpeshyi iyo virusi ishobora kwica itahuwe mu bizamini byafashwe mu mazi mabi.

"Ihagarika ry'imirwano ry'igihe gito ngo hakorwe ubutabazi" ryemeranyijwe ko rizaba inshuro eshatu – guhera kuri iki cyumweru. Ryagezweho hagati ya Israel na Hamas kugira ngo abashinzwe ubuvuzi bashobore gukingira abana bagera ku 640,000 bafite munsi y'imyaka 10.

Ibi bibaye nyuma yuko ubwandu bwa mbere bubayeho mu myaka irenga 25 butahuwe mu kwezi gushize mu ruhinja rw'Umunye-Palestine rw'amezi 10.