Roberto Firmino: Umutoza Jurgen Klopp 'yatunguwe gacyeya' n'icyemezo cy'uyu rutahizamu cyo kuva muri Liverpool

Umutoza wa Liverpool Jurgen Klopp avuga ko "yatunguwe" n'icyemezo cya Roberto Firmino cyo kuva muri iyi kipe ubwo uyu mwaka w'imikino uzaba urangiye.

Uyu rutahizamu w'Umunya-Brazil azasoza imyaka umunani yari amaze muri iyi kipe, ubwo kontaro ye izaba irangiye mu kwezi kwa gatandatu uyu mwaka.

Firmino, w'imyaka 31, yari amaze igihe mu biganiro na Liverpool ku kuba yamuha iyindi kontaro ariko yahisemo kuva muri iyi kipe.

Ku wa gatanu, Klopp yagize ati: "Naratunguwe? Yego, mo gacyeya - byashoboraga kuba ku mpande zombi nuko biba ku ruhande rumwe. Kandi ibyo ndabyubaha cyane".

"Ariko birasanzwe rwose mu mubano nk'uyu w'igihe kirekire dufitanye ndetse na Bobby [izina ry'irihimbano rya Roberto Firmino] afitanye n'ikipe.

Firmino yatsindiye Liverpool ibitego birindwi mu mikino 13 ya Premier League mbere y'akaruhuko ko kwitegura imikino y'igikombe cy'isi cyo mu mwaka ushize, ariko yavunitse mu mpfundiko bituma amara amezi abiri adakina nyuma yuko imikino ya Premier League yari yongeye gusubukurwa.

Yasubiye gukinira Liverpool mu mukino w'abacyeba (derby) wo mu kwezi kwa kabiri, ubwo Liverpool yatsindaga Everton ibitego 2-0, ariko kugeza ubu yakinishijwe inshuro eshanu asimbuye, mu gihe umukinnyi Cody Gakpo Liverpool yaguze mu kwa mbere ari we ubanzamo imbere hamwe na Darwin Nunez na Mohamed Salah.

Ariko ku cyumweru, yinjiye mu kibuga asimbuye atsinda igitego cya nyuma cya Liverpool - cyabaye icya 108 mu mikino 354 amaze kuyikinira - ubwo yanyagiraga Manchester United ibitego 7-0.

Klopp yagize ati: "Nakunze ukuntu yakiriwe [n'abafana] ubwo yari yinjiye mu kibuga asimbuye dukina na United". Klopp yongeyeho ko uyu rutahizamu yamubwiye ko ubu ashaka "gusoza neza uyu mubano w'agatangaza" afitanye n'iyi kipe.

Hamwe na Firmino, Liverpool yatsindiye igikombe cya Champions League, Premier League, FA Cup, EFL Cup n'igikombe cy'isi cy'ama-club.

Ibyo bituma yakwitega ko ashobora gusezerwaho mu buryo bwihariye mu mukino wa nyuma Liverpool izaba yakiriye i Anfield muri uyu mwaka w'imikino, uzayihuza na Aston Villa ku itariki ya 20 y'ukwezi kwa gatanu.

Klopp yongeyeho ati: "Nta gihe cyo gusezeraho [gihari] muri aka kanya, hazabaho igihe gihagije cyabyo nyuma yaho muri uyu mwaka w'imikino".

"Igihe icyo ari cyo cyose azagarukira, buri muntu wese arabizi ko indirimbo [abafana ba Liverpool bamuririmbira] izaba icyumvikana igihe kirekire cyane mu matwi ya buri wese.

"Ntekereza ko ari umwe muri ba bakinnyi n'iyo yakwinjira mu kibuga akinira ikipe duhatanye, abantu bakwishimira rwose kumubona".