Haje ikoranabuhanga rishya rirwanya 'bots za AI' zisahura amakuru ku mbuga

Imbuga (websites) zibarirwa muri za miliyoni – zirimo Associated Press, Sky News na Buzzfeed – ubu zizajya zibasha kubuza 'bots' za 'artificial intelligence'(AI) zifatwa nka 'rusahuzi' kugera ku makuru yazo zidahawe uburenganzira.

Ubu buryo bwo kurengera amakuru bwazanywe n'ikigo kitwa Cloudflare gifite/kibika (hosting) ibigera kuri kimwe cya gatanu cya murandasi (internet) yose.

'Bots' - porogaramu za mudasobwa zikora nk'aho ari abantu nya bantu, za kompanyi za AI zishobora kandi gusura imbuga, zikavanaho amakuru ziha abazitumye akifashishwa bitewe n'ikigamijwe.

Intego ni uko imbuga za internet zizajya zibasha kwishyuza kompanyi za AI ku gukoresha amakuru yazo.

Abanditsi bakomeye, abanyamuziki, abanyabugeni batandukanye bashinja kompanyi zikora AI gutoza 'systems' zabo kwigana no gukoresha ibihangano byabo nta burenganzira cyangwa kubyishyura.

Mu bihugu bimwe, nko mu Bwongereza, ibi byateye ikibazo gikomeye hagati ya leta n'abahanzi, barimo Sir Elton John, kigendanye no kurengera ibihangano byabo.

Ubu buhanga bushya bwa Cloudflare buribanda kuri kompanyi zikora 'bots' za AI – zizwi nka 'crawlers' (rusahuzi za 'data') – izi ni porogaramu za mudasobwa zisura imbuga(websites), aho zinyuze zigakurayo amakuru (data).

Izo 'bots' n'ibyo zitwara, ni ingenzi cyane mu buryo kompanyi za AI zubaka, zigatoza, kandi zigakoresha 'systems' zazo.

Cloudflare ivuga ko kugeza ubu iryo koranabuhanga rishya ryayo ririmo gukora kuri 'websites' zigera kuri miliyoni.

Roger Lynch ukuriye ikigo Condé Nast gifite imbuga zirimo GQ, Vogue, na The New Yorker yavuze ko iri koranabuhanga ari "impinduka ikomeye" ku bitangazamakuru.

Mu itangazo yanditse ati: "Iyi ni intambwe ikomeye mu kubaka kugurirana gukwiye kuri internet, irengera abahanga amakuru (data), ifasha itangazamakuru rinoze kandi ituma kompanyi za AI ziryozwa ibyo zikora".

Gusa izindi nzobere zivuga ko amategeko akaze kurushaho yo kurengera ibikorwa bwite by'abantu azakomeza gukenerwa.

'Gukomeza kubaho muri iki gihe cya AI'

Ku ikubitiro iri koranabuhanga rizifashishwa n'abashya mu gukoresha serivisi za Cloudflare, hamwe n'imbuga zifashishijwe mu muhate wa mbere wo kugerageza guhagarika (block) za 'rusahuzi' bita 'crawlers'.

Ibinyamakuru n'abanditsi bashinja kompanyi zikora AI gukoresha amakuru (content) yabo nta burenganzira.

Vuba aha, BBC yaburiye ko izafatira ingamba z'amategeko kompanyi yo muri Amerika ikora AI yitwa Perplexity, iyisaba guhagarika gukoresha 'content' ya BBC, no kwishyura indishyi ku yo bamaze gukoresha.

Gusa muri rusange ibinyamakuru n'abanditsi bishimira ko ziriya 'rusahuzi' za 'data' (crawlers bots) ariko z'ibigo by'ishakiro ry'amakuru nka Google, zinjira ku mbuga zabo, ariko na zo zikerekeza (direct) abantu kuri izo mbuga zasuye.

Cloudflare ishinja kompanyi za 'rusahuzi' za AI gukusanya amakuru nk'inyandiko, inkuru zanditse, amafoto, n'amashusho zikabyifashisha mu gutanga ibisubizo kandi ntizohereze abantu aho zabivanye – bikabuza ba nyiri 'content' kugira inyungu babona.

Matthew Prince ukuriye Cloudflare yanditse ati: "Niba internet izabasha kubaho muri iki gihe cya AI, tugomba kubaka uburyo bushya burengera abarema 'content' kandi bufasha buri wese".

Mu kugera kuri ibyo, Cloudflare irimo gukora 'system' yise "Pay Per Crawl", izaha uburyo abafite imbuga zabo ziriho ibihangano cyangwa amakuru yabo, kwishyuza kompanyi zikora AI igihe zikoresheje 'content' y'umwimerere yabo.

Intambara na za 'bots'

Ku bwa Cloudflare, ubu habayeho kwiyongera guteye ubwoba kw'ibikorwa bya 'bots' za AI.

Muri Werurwe(3), iyi kompanyi yaranditse iti: "'AI Crawlers' ubwazo zikora ubusabe (requests) burenga miliyari 50 kuri 'network' ya Cloudflare buri munsi".

Hari impungenge kandi ko zimwe muri izo 'rusahuzi' za AI zirengagiza amabwiriza ariho abuza 'bots' ku mbuga zitandukanye.

Iyo 'system' nshya ya Cloudflare igerageza kubuza 'bots' kugera kuri 'content' y'imbuga kandi igaha izo mbuga uburyo bwo kwishyuza kompanyi za AI zishaka kwinjira kuri izo mbuga.

Ed Newton-Rex washinze ikigo Fairly Trained gifasha kompanyi za AI gutoza 'systems' zazo kumenya amakuru arinzwe kandi yishyuzwa avuga ko iri koranabuhanga rishya ari intambwe nto, ko hakenewe byinshi.

Yabwiye BBC ati: "Iki rwose ni nk'igipfuko [ku gisebe] mu gihe igikenewe ari ukubaga."

Yongaraho ati: "Izatanga gusa uburinzi kuri websites bene zo bagenzura – ni nko kuguha ikirinda umubiri wawe [ariko] gihagarika gukora igihe usohotse iwawe.

"Uburyo bwonyine nyabwo bwo kurinda 'content' y'abantu gusahurwa na kompanyi za AI ni ubuciye mu mategeko."

Baroness Beeban Kidron ukora za filimi, urimo guhirimbanira kurengera urwego rw'abahanzi n'abanyabugeni, yishimiye aya makuru avuga ko Cloudflare yateye intambwe yo kuyobora abandi.

Yabwiye BBC ati: "Cloudflare ni umutima w'isi ya 'digital' kandi birashimishije kubona bafata ingamba zikomeye."

Yongeraho ati: "Niba dushaka iterambere ry'abantu birakwiye ko kompanyi za AI zitanga umusanzu wazo mu byo zikora, ibyo bivuze kwishyura ibyo zikenera, no kwishyura abo zatwariye 'content' kugira ngo zubake ibyo zikora.

"Cloudflare ubu yerekanye ko bishoboka gukoresha ikoranabuhanga mu gutuma haba uburinganire hagati y'abantu barema 'content' na AI ishaka kuyikoresha."