Imvo n'Imvano ku migambi Perezida w'Amerika watowe yiyemeje n'imbogamizi ziri imbere

Mwaramukanye amahoro mwese muteze amatwi Imvo n'Imvano yo kuri uyu wa gatandatu tariki 9 z'ukwa 11 mu 2024. Muri iki cyumweru, amahanga yose yari ahanze amaso ku matora yo muri Amerika, yabaye ku wa kabiri w'iki cyumweru.

Muri ayo matora hatorwa umukuru w'igihugu, abagize inama nshingamateka, bamwe mu bagize inama nkenguzamateka, hamwe rero na bamwe mu bayobora intara.

Ayari ahanzwe amaso cyane ni ay'umukuru w'igihugu, aho icyegera cy'umukuru w'igihugu Kamala Harris yahanganaga n'uwahoze ari umukuru w'igihugu Donald Trump.

Byarangiye Donald Trump aciye umuhigo wo kongera kuyobora Amerika mu kiringo cya kabiri, nyuma yo gutsindwa na Joe Biden mu matora ashize yo mu 2020.

Ibyo byatumye Trump agiye kuba umukuru w'igihugu w'Amerika wa 47, bikaba biteganyijwe ko imihango yo kurahirira ayo mabanga izaba nkuko bisanzwe mu kwezi kwa mbere kw'umwaka utaha.

Ikindi cyaranze ayo matora, ni ukuntu mbere yuko amatora aba, amajwi y'abahanganye yari yegeranye cyane kurusha ikindi gihe, ariko ibivuye mu matora bigatanga imibare itandukanye n'ibyo abashakashatsi bari bavuze.

Hari no kuba Amerika yari igiye kubona bwa mbere umugore w'umwirabura (uvanze) ubaye umukuru w'igihugu.

Gusa ikindi cyaranze aya matora ni ikibazo cy'umutekano, aho mu kwiyamamaza Donald Trump yarashwe ku gutwi – Imana ikinga ukuboko nkuko we yabyivugiye, abakuru b'amaleta amwe bakagomba kwitabaza inkeragutabara kugira ngo bacunge umutekano w'abantu n'ibintu igihe amatora yabaga, kuko batari bazi uko ibintu biza kugenda narangira.

Ubu rero haribazwa niba ibyo Trump, w'imyaka 78, yemereye abamutoye igihe yiyamamazaga, azabishyira mu bikorwa.

Ibiza ku isonga ni ikibazo cyo gusubiza iwabo abimukira binjiye mu gihugu mu buryo butemewe n'amategeko, ikibazo cy'umutekano w'imbibi z'Amerika, no kurangiza vuba intambara ya Ukraine n'Uburusiya hamwe n'iya Israel na Hamas na Hezbollah bifashwa na Iran.

Hari kandi n'ikibazo cy'ubukungu – uko yagabanya ibiciro by'ibintu by'ibanze mu gihugu.

Imvo n'Imvano igiye kugaruka ku migambi yiyemeje no kureba imbogamizi ziri imbere. Imvo n'Imvano kandi irabaza ku kuba Trump avuga ko Amerika ari yo agiye gushyira imbere, niba haba hari icyo ubutegetsi bwe buzahindura ku migambi y'Amerika ku mugabane w'Afurika, cyane cyane mu karere k'ibiyaga bigari.

Abatumire bacu ni Claude Rwaganje ukora mu karere ka Westbrook muri leta ya Maine, mu 2019 no mu 2022 akaba yariyamamaje mu ishyaka ry'abademokarate – ashyigikiye Kamala Harris.

Turi kumwe kandi na Espérance Hope Ikora, we mu 2022 yiyamamaje nk'umushingamateka wo mu ishyaka ry'abarepubulikani muri leta ya Iowa, ni umunyeshuri wiga siyanse ya politike (political science) – ashyigikiye Donald Trump.

Turi kumwe kandi na Dr Joseph Sebarenzi, umusesenguzi mu bya politike utuye muri Amerika.

Iki kiganiro mwagiteguriwe kandi murakigezwaho na Félin Gakwaya.