Francophonie: 'Guhoberana kwishimiwe' kwa Vital Kamerhe wa RDC na Mussa Fazil Harerimana w'u Rwanda

Guhoberana kwa Perezida w'inteko ishingamategeko ya RD Congo na Visi perezida w'inteko ishingamategeko y'u Rwanda biri mu byaranze umunsi wa nyuma w'Inama ya 50 y'ihuriro ry'abagize inteko zishingamategeko z'ibihugu bihuriye mu muryango wa Francophonie yaberaga i Paris mu Bufaransa.

Vital Kamerhe na Mussa Fazil Harerimana bakomewe amashyi na bagenzi babo barenga 200 bari bitabiriye iryo huriro ry'abagize inteko zishingamategeko zo muri ibi bihugu bikoresha Igifaransa.

Iri huriro rivuga ko mu mirimo yaryoyatangiye ku wa gatatu ushize igasozwa ku cyumweru gishize "yashyize umwihariko ku mwanzuro ureba akarere k'ibiyaga bigari".

Mu myanzuro yemejwe n'iyo nama, ku ureba aka karere, iyi nama yemeje ko ishyigikiye amasezerano y'amahoro ya Washington hagati y'u Rwanda na RD Congo yasinywe mu kwezi gushize, n'umuhate wa Togo n'Ubumwe bwa Afurika muri ubwo buhuza.

Iri huriro, nta gihugu ritunze urutoki, ryavuze ko "ryamaganye nta rujijo kwinjira kw'ingabo [mu kindi gihugu] no gushyigikira imitwe yitwaje intwaro", rivuga kandi ko risaba "kubaha ubusugire bw'ibihugu by'akarere no kutavogera imipaka", nk'uko biri mu itangazo ry'imyanzuro yaryo risubirwamo n'ibiro ntaramakuru AFP.

Iri huriro rivuga ko ryashimye "amagambo y'amahoro" no "guhoberana kwa kivandimwe" hagati ya Vital Kamerhe na Mussa Fazil Harerimana, "kwahawe amashyi" n'abari bateranye n'abakuru b'iri huriro.

Kuri uwo munsi wa nyuma w'iyi nama, Vital Kamerhe yavuze ko igihugu cye "cyiteguye kubaka amahoro n'umuturanyi wacu, u Rwanda", avuga kandi biteguye "kubabarira" ariko ko hakenewe "ubutabera".

Mussa Fazil Harerimana yavuze ko "U Rwanda na rwo rwiteguye gushyigikira imihate yose igamije amahoro".

Mu gihe iri huriro ryashimye umuhate w'ubutegetsi bw'ibihugubyombi wo gushaka amahoro, haracyari intambwe yo guterwa mu guhagarika nyabyo imirwano mu burasirazuba bwa DR Congo.

Kuva mu mpera z'icyumweru gishize byavuzwe ko impande zishyamiranye, M23 n'ingabo za leta, zirimo gushyira ingabo nyinshi ku mipaka y'aho zigenzuramu bigaragara nko kwitegura imirwano.

Impande zombi kandi zishinjanya gutangiza imirwano ya hato na hato igenda yumvikana aho impande zombi zigabanira mu ntara za Kivu ya Ruguru na Kivu y'Epfo.

Ibyo biraba mu gihe ibiganiro byo kugera ku masezerano y'amahoro hagati ya M23 na leta ya Kinshasa bikomeje i Doha muri Qatar, aho bivugwa ko abahuza, Qatar na Amerika, bifuza ko impande zombi zigera ku bwumvikane muri iki cyumweru.

Intumwa za leta ya Kinshasa i Doha zikuriwe na Sumbu Sita Mambu, umwe mu ntumwa nkuru ya Perezida Félix Tshisekedi, mu gihe iz'uruhande rwa M23 zikuriwe na Benjamin Mbonimpa, umunyamabanga w'ihuriro AFC/M23.

Radio RFI ivuga kandi ko Jacquemain Shabani, Minisitiri w'ubutegetsi bw'igihugu wa RD Congo, na Vincent Biruta, Minisitiri w'umutekano w'u Rwanda, na bo bakiri i Doha aho batumiwe n'abahuza gukurikirana ibi biganiro.