Neymar yongeye kubura ku mukino wahuriranye n'isabukuru ya mushiki we akunda biteza sakwe sakwe

Ku nshuro ya 10 mu myaka 12 ishize Neymar nanone ntabwo yakinnye umukino w'ikipe ye wahuriranye n'ibihe by'isabukuru ya mushiki we.

Ni imwe mu nkuru yagarutsweho cyane muri Brazil no mu bazi iki cyamamare, nyuma y'uko ikipe ya Santos FC akinira imuruhukije ku wa kabiri nijoro ku mukino na Mirassol.

Santos y'iwabo muri Brazil yatangaje ko Neymar atakinnye "nk'ingamba yo kwirinda" kubera umunaniro w'imikaya, yari amaze iminsi akorerwa amagerageza nyuma yo gukira imvune.

Gusa kuba atarakinnye kandi atagifite imvune, abafana babihuje ibyabaye mu myaka yashize aho yagiye asiba ku mikino yahuriranye n'isabukuru ya mushiki we.

Rafaella Santos wizihiza isabukuru ku wa 11 Werurwe (3), ni mushiki wa Neymar bafitanye ubucuti bukomeye.

Neymar afite 'tattoo' y'isura ya mushiki we ku kaboko, mu gihe amaso ya Neymar ashushanyije ku mugongo wa Rafaella nka tattoo.

Muri sizeni ya 2019/2020 Neymar yakinnye umukino ku isabukuru ya mushiki we anatsinda igitego muri 2 – 0 Paris Saint-Germain yatsinze Dortmund.

Uwo niwo mukino wonyine yakinnye mu yindi yose yahuriranye n'iminsi y'isabukuru ya mushiki we mu myaka 12 ishize.

Avuga ku kubura kwe ku wundi mukino wahuye n'isabukuru ya mushiki we, Neymar yanditse ku mbuga nkoranyambaga ati:

"Hari abantu benshi bahimba amakuru ku birimo kumbaho. Ntacyo bitwaye.

"Iyo nkinanye imvune, mba nkosheje. Iyo nitaye ku magara yanjye, mba nkosheje. Iyo nkiniye ku bubabare, mba nkosheje. Biragoye cyane kudakosa."

Neymar yongeyeho ko ikimutangaza ari uko mu bahimba inkuru kuri we harimo n'abantu "baba bari kumwe nanjye buri munsi".

Ati: "Biragoye cyane kuba njyewe. Mana yanjye…Ngomba kwihangana cyane".

Guhagarikwa, imvune zikomeye cyangwa kutaba ameze neza byagiye bituma Neymar abura ku mikino imwe n'imwe yo hagati mu kwezi kwa gatatu kuva mu myaka 12 ishize.

Carlo Ancelotti utoza ikipe y'igihugu ya Brazil yagombaga kuza kureba umukino wo ku wa kabiri nijoro mbere yo kwemeza urutonde rw'abakinnyi azajyana mu gikombe cy'isi cy'uyu mwaka kizabera muri Mexico, Amerika na Canada, ariko ntiyawujyaho nk'uko ibinyamakuru muri Brazil bibivuga.

Ntibizwi neza niba yarahagaritse iyo gahunda amenye ko Neymar atagikinnye.

Neymar Jr ni we mukinnyi ufite ibitego byinshi mu ikipe y'igihugu ya Samba Boys ariko ntibirizerwa neza ko azahamagarwa kubera imvune yagiye agira mu myaka ya vuba ishize.