U Rwanda na Arsenal FC bumvikanye gusoza amasezerano ya Visit Rwanda 'iyi sizeni nirangira'

U Rwanda rwarangije amasezerano yari amaze imyaka irindwi yo kwishyura ikipe ya Arsenal FC yo muri shampiyona y'Ubwongereza nayo ikamamaza ikirango cya Visit Rwanda.

Itangazo ry'ikigo cy'u Rwanda gishinzwe iterambere, Rwanda Development Board (RDB), rivuga ko iki kigo na Arsenal "bumvikanye kurangiza ubufatanye bwabo iyi sizeni nirangira" muri Kamena(6) 2026.

Arsenal na yo, mu itangazo ryayo, yemeje kurangira kw'aya masezerano n' "umufatanyabikorwa wa mbere wa Arsenal wemewe [wamamaje] ku kaboko" aho ikirango cya Visit Rwanda kigaragara.

Aya masezerano yatangiye mu 2018 ari ay'imyaka itatu, yongerewe mu 2021, ubu akaba yari arangije igihe cyayo, u Rwanda ruhitamo kutayongera.

Nk'uko biri mu igenzuramari rya 2023-24 ryakorewe Arsenal, iyi kipe yahawe miliyoni 13.4 z'amadorali ya Amerika (ni hafi miliyari 20 Frw) ku mwaka muri aya masezerano yo kwamamaza Visit Rwanda.

Mu byumweru bishize hatangajwe amakuru ko impande zombi ziri mu biganiro byo kureba niba aya masezerano yakongerwa cyangwa yahagarikwa.

Muri iki cyemezo RDB yatangaje uyu munsi, ivuga ko igamije "kwagura mu yandi masoko mashya" mu kiciro "gikurikiyeho" cy'intego zayo zo guteza imbere ubukerarugendo.

U Rwanda ruvuga ko aya masezerano na Arsenal amaze "sizeni umunani" z'imikino yatumye abasura iki gihugu bagera kuri miliyoni 1.3 mu mwaka ushize.

RDB yongeraho ko kuva aya masezeno asinywe umusaruro uva mu bukerarugendo wiyongereyeho 47% ukagera kuri miliyoni 650$.

Mu bikorwa bamazemo igihe, bamwe mu bafana ba Arsenal basabye inama y'ubutegetsi y'iyi kipe gushyira "inyungu ku ruhande" ntiyongera amasezerano na RDB.

Aba, bashinja leta y'u Rwanda gufasha umutwe wa M23 bityo ikagira uruhare mu ntambara mu burasirazuba bwa Repubulika ya Demokarasi ya Congo, intambara yicirwamo abasivile benshi igatera abandi ubuhunzi.

Leta y'u Rwanda ihakana gufasha umutwe wa M23, ko yafashe gusa ingamba zo kwirinda, kandi ko nta ruhare ifite mu ntambara muri Congo.

Itangazo rya RDB risubiramo umukuru w'iki kigo Jean-Guy Afrika agira ati: "Dutewe ishema n'icyo ubu bufatanye bwagezeho mu myaka myinshi y'ubufatanye".

Itangazo rya Arsenal risubiramo umukuru wayo Richard Garlick, avuga ko bafashije u Rwanda kumenyekanisha ubukerarugendo bwarwo kw'isi kandi bishimira ibyo ubu bufatanye bwagezeho.

Perezida Paul Kagame w'u Rwanda azwiho kuba umufana w'ikipe ya Arsenal ubu iri ku mwanya wa mbere muri shampiyona y'Ubwongereza igeze ku munsi wa 11.

U Rwanda, biciye muri RDB, rufite andi masezerano nk'aya yo kwamamaza 'Visit Rwanda' n'andi makipe y'i Burayi ya Paris Saint-Germain yo mu Bufaransa na Atlético de Madrid yo muri Espagne.

RDB iherutse gusinya amasezerano nk'aya n'amakipe yo muri Amerika ya LA Clippers yo muri shampiyona ya Basketball ya NBA na Los Angeles Rams yo muri shampiyona y'umukino wa footaball y'Abanyamerika ya NFL.