Imirwano ikomeye mu misozi ya Fizi – FARDC na Twirwaneho bararwanira Point-Zéro

Imirwano yabaye ku wa kabiri, ku wa gatatu n'uyu munsi ku wa kane hagati y'ingabo za leta na Wazalendo hamwe n'abarwanyi ba Twirwaneho bakorana n'umutwe wa M23 mu gace k'imisozi ya Fizi mu ntara ya Kivu y'Epfo ya DR Congo yasize abantu ibihumbi bavuye mu byabo, nk'uko ibinyamakuru muri iki gihugu bibitangaza.

Amasôko atandukanye y'amakuru yemeza ko iyi mirwano yibanze ku kurwanira agace k'ingenzi cyane mu ngendo no mu bya gisirikare ka Point-Zéro, n'inkengero zako.

Ibinyamakuru bimwe muri DR Congo byemeje ko ingabo za leta zifatanyije na Wazalendo bakuye abarwanyi ba Twirwaneho kuri Point-Zéro kuri uyu wa kane, agace bari bamaze hafi ibyumweru bibiri bafashe.

BBC yabajije uruhande rwa FARDC n'urwa Twirwaneho kuri ibi ariko ntacyo impande zombi zasubije kugeza ubu.

Point-Zéro ni agace kari hejuru mu karere k'imisozi ya Fizi, kakaba isangano ry'amayira yerekeza mu bice bitandukanye birimo umujyi wa Uvira mu majyaruguru ashyira uburasirazuba, Mikenke na centre ya Minembwe mu burengerazuba, Fizi na Baraka mu majyepfo.

Radio Maendeleo ikorera muri Kivu y'Epfo yatangaje ko abasivile benshi bakomeje guhunga kuko badashoboye "kwihanganira ubukana bw'iyi mirwano" kandi ko benshi mu barimo guhunga basanzwe n'ubundi ari impunzi "zihora ziva mu karere zihungira mu kandi" bitewe n'uko ibintu byifashe.

Iyi radio ivuga ko abantu ibihumbi biganjemo abana n'abagore bari barahunze bava mu misozi miremire bakerekaza mu gace ka Point Zéro ubu "byabaye ngombwa ko bongera guhunga" bajya aho babona ko hatekanye.

Ingaruka z'iyi mirwano ni uko abana batakijya kwiga, abagore n'abantu bashaje n'abarwayi ntibabone ubuvuzi, imiryango ntibone ibiyitunga kuko yavuye mu byayo kandi ikaba nta bufasha bundi ibona, nk'uko byinubirwa n'imiryango irengera abari mu kaga.

Umwe mu baturage bari mu gace ka Minembwe wavuganye na BBC Gahuzamiryango yemeje ko bafite amakuru ko FARDC na Wazalendo "bashobora kuba koko bafashe Point-Zéro, nubwo nta gihamya ntakuka turabona".

Ku wa kabiri w'iki cyumweru abarwanyi ba Twirwaneho batangaje ko bamagana ibitero by'ingabo za leta ku Banyamulenge mu duce twa Mitamba na Kajoka no kuri Point Zéro mu misozi ya Minembwe.

Twirwaneho ku wa gatatu yatangaje ko abarwanyi bayo bari kuri Point-Zéro, muri 10km uvuye i Minembwe, bahanuye indege yo mu bwoko bwa 'drone' y'ingabo za leta "yitegura kurasa" kuri Minembwe.

Uruhande rw'ingabo za leta na Wazalendo ruvuga ko muri iyi minsi bigaruriye ibice bitandukanye mu ntara ya Kivu y'Epfo muri teritwari ya Fizi byagenzurwaga na Twirwaneho cyangwa na M23.