Ukraine: Abategetsi ba Amerika Antony Blinken na Austin ushinzwe ingabo bahuye na Zelensky

Kuri iki cyumweru wari umunsi ukomeye mu idini rya Orthodox mu Burusiya na Ukraine ariko ingabo z'uburusiya zakomeje kurasa ibisasu aho batarafata i Mariupol hamwe no mu bindi bice by'iburasirazuba.

Blinken na Austin basuye Zelensky i Kyiv

Leta ya Amerika yemeje ko minisitiri w'ububanyi n'amahanga Antony Blinken na minisitiri w'ingabo Lloyd Austin bari i Kyiv muri Ukraine ku cyumweru aho baganiriye na Perezida Volodymyr Zelensky.

Mbere, abategetsi muri Ukraine bari bavuze ko Blinken ari muri iki gihugu, ariko Amerika yirinze kugira icyo ibivugaho.

Ariko mu gitondo none kuwa mbere (mu ijoro muri US), Washington yemeje iby'urwo ruzinduko inavuga ko aba bombi ubu batakiri ku butaka bwa Ukraine.

Amerika n'ibihugu by'i Burayi bikomeje koherereza Ukraine inkunga ya gisirikare.

Mu ntangiriro y'iyi ntambara Uburusiya bwari bwaburiye ko uwariwe wese uzafasha Ukraine azahura n'ingaruka zikomeye.

Ubushinwa nabwo bwamaganye kuba ibihugu by'iburengerazuba bifasha Ukraine.

Indi nkunga ya gisirikare ya miliyoni $700

Mu nama i Kyiv hagati ya Zelensky n'abategetsi ba Amerika bamusuye, iki gihugu cyashimangiye indi nkunga mu bya gisirikare ya miliyoni $700 yo gufasha iki gihugu mu ntambara.

Agera kuri kimwe cya kabiri cy'iyi nkunga azajya muri Ukraine, naho asigaye agabanywe ibihugu bigize NATO/OTAN n'inshuti zayo.

Hejuru y'ibyo, Amerika izagurisha amasasu y'agaciro ka miliyoni $165.

Ibi byatangajwe nyuma y'urugendo rw'ibanga rwa bariya bategetsi ba Amerika kubera impungenge z'umutekano.

Uburusiya burategura referandumu i Kherson - Ubutasi bwa UK

Uburusiya burimo gutegura "amatora afifitse ya referandumu" mu mujyi wo mu majyepfo ya Ukraine wa Kherson yo gusobanura impamvu yo kuwufata, nk'uko minisiteri y'ingabo z'Ubwongereza ibivuga.

Raporo y'iyi minisiteri ivuga ko uyu mujyi ari ingenzi ku Burusiya kuko uba inzira y'ubutaka igera ku mwigimbakirwa wa Crimea Uburusiya bwambuye Ukraine mu 2014.

Yongeraho ko Uburusiya bwakoze igikorwa nk'iki mu gushaka gushimangira impamvu bwafashe Crimea.

Kherson niwo mujyi wonyine munini Uburusiya bwabashije gufata kuva bwatera Ukraine mu kwezi kwa kabiri.

Ariko ibice biwukikije byongeye kwisubizwa n'ingabo za Ukraine, kandi imirwano muri ako gace irakomeje.

Ukraine irasaba ibiganiro ku ruganda rwagoswe i Mariupol

Kyiv irimo gusaba ibiganiro byihariye byo gushaka amahoro n'Uburusiya by'umwihariko ku gace karimo uruganda rw'ibyuma kagoswe muri Mariupol, nk'uko umujyanama wa perezida wa Ukraine abivuga.

Oleksiy Arestovych yasabye ko ibiganiro byashakisha agahenge kandi bikanzura icyakorwa ku basivile n'abarwanyi baheze muri uyu mujyi wo ku cyambu.

Mu gihe cy'ibyumweru itsinda rito ry'abarwanyi ba Ukraine bashyize ibirindiro muri ruriya ruganda rw'ibyuma babujije ingabo z'Uburusiya kugenzura byuzuye icyambu cy'ingenzi.

Hari amakuru ko mu bari kumwe n'abo barwanyi harimo n'abasivile hamwe n'abana bari muri urwo ruganda.

Impaka ku busabe bwa Ukraine bwo kwinjira muri EU

Ukraine yatangaje ko ibabajwe no kuba umuhate wayo wo kwinjira mu bihugu bigize Ubumwe bw'Uburayi (EU) urimo kwangwa na Austriche.

Minisitiri w'ububanyi n'amahanga wa Autriche Alexander Schallenberg yasubiwemo avuga ko Kyiv idakwiye kwakirwa muri EU, ahubwo hakwiye gushakwa izindi nzira z'umubano wa EU na Ukraine.

Ukraine yavuze ko ibyo Alexander yavuze birimo "kureba hafi".

EU yagiye inyuma ya Ukraine muri iyi ntambara, ifatira ibihano Uburusiya kubera gutera icyo gihugu.

Mu mafoto: Ukraine yizihije pasika mu ntambara

Miliyoni z'abanya-Ukraine bo mu idini rya Orthodox kuri iki cyumweru bizihije pasika, ya mbere bari mu ntambara mu myaka myinshi ishize.

Imitsima ya pasika, amagi asize amarangi, n'andi mafunguro y'ibirori yari yateguwe mu gihe imiryango yahuriye hamwe ngo yizihize uyu munsi ukomeye.

Ibi ariko nko mu burasirazuba byabaye mu gihe hari aharimo kuraswa ibisasu n'ingabo z'abarusiya zitabahaye agahenge.

Papa Francis wa kiliziya gatolika nawe mu misa yo kuri iki cyumweru yongeye gusaba guhagarika intamabara muri Ukraine.

Aya ni amwe mu mafoto yo kwizihiza pasika: