Ukraine - Russia: Amakuru, amafoto na infographics - iminsi 7 mu ntambara
Ahavuye isanamu, Getty Images
Icyumweru kirashize Uburusiya buteye Ukraine kandi ibitero birakomeje ku mijyi ikomeye - nubwo ubu umujyi umwe mu minini ari wo umaze gufatwa.
Ingaruka z'iyi ntambara ntiziri muri Ukraine no muri kariya karere gusa, henshi ku isi ziri kubageraho.
Ibiganiro bigiye gusubukura
Intumwa za Ukraine n'Uburusiya zirahurira bwa kabiri muri Belarus mu biganiro byo gushaka kumvikana.
Kimwe mu by'ibanze ubu Kyiv isaba ni inzira ku basivile bifuza guhunga uduce turi kuberamo imirwano.
Ibi ni ibivugwa n'umwe mu ntumwa za Ukraine zigiye muri ibi biganiro Davyd Arakhamia.
Abantu bahunze Ukraine bageze kuri miliyoni imwe mugihe ibisasu by'imizinga, indege z'abarusiya, n'abasirikare bikomeje gushegesha imijyi myinshi mu majyepfo.
Sergei Lavrov, minisitiri w'ububanyi n'amahanga w'Uburusiya, avuga ko ibyo bo bifuza ari:
- "Kuvana intwaro" muri Ukraine no "kuyivanamo aba-Nazi"
- Crimea - Ko Kyiv yemera ko uyu mwigimbakirwa wigaruriwe na Moscow mu 2014 ari ubutaka bw'Uburusiya
- Ko uduce tubiri Donetsk na Luhansk two mu burasirazuba bwa Ukraine, natwo Kyiv itwemera nka repubulika zigenga
Ni ibiki byabaye none kuwa kane?
- Ingabo z'Uburusiya zafashe umujyi wa Kherson mu majyepfo. Niwo mujyi wa mbere munini ufashwe n'abarusiya
- Abantu barenga miliyoni imwe bamaze guhunga kuva kuwa kane ushize, nk'uko bivugwa na ONU, abarenga 500,000 bahungiye muri Pologne
- Iperereza ku bishobora kuba ari ibyaha by'intambara ryatangijwe n'urukiko mpuzamahanga mpanabyaha (ICC) rw'i La Haye
- Imijyi myinshi ikomeje kuraswaho irimo Mariupol - aho umukuru wawo yavuze ko inkomere zitari gufashwa kubera ibisasu birimo kuraswa ubudakuraho
- Minisitiri Sergei Lavrov yavuze ko intambara ya gatatu y'isi yaba kirimbuzi, ariko ko atari ikintu Abarusiya bari gutekereza
- Umurwa mukuru Kyiv, ukomeje kugenzurwa na leta, nubwo ukomeje kuraswaho ibisasu byinshi kandi imodoka nyinshi z'intambara z'Uburusiya zikaba ziri hafi yawo - Amerika ivuga ko zitakomeje kuko zabuze ibitoro
Ibivugwa n'impande zombi ku bapfuye
Igisirikare cya Ukraine buri munsi kivuga imibare y'abo ku ruhande rw'Uburusiya cyishe, nubwo aba bakomeje gusatira imijyi ikomeye yo mu majyepfo.
Tugomba kwibutsa ko BBC itabasha kugenzura amakuru avugwa n'impande zombi ku bapfuye, inkomere, n'ibyangijwe.
Ibiro bikuru by'ingabo za Ukraine uyu munsi byavuze ko hafi abasirikare 9,000 b'Uburusiya bishwe cyangwa bakomerekeye muri iyi mirwano.
Bivuga kandi ko ingabo za Ukraine zangije:
- ibifaru 217
- intwaro 90 zirasa imizinga
- kajugujugu 31
- indege zindi 30
Uburusiya, kuwa gatatu ku nshuro ya mbere bwatangaje umubare w'ibyo bwatakaje muri Ukraine, buvuga ko abasirikare 498 bapfuye, naho 1,600 bakomeretse.
Buvuga ko bwo bwishe abasirikare "n'impirimbanyi" 2,870 ba Ukraine.
Ni ingenzi kwibuka ko abaturage babarirwa mu magana bamaze kwicwa muri iyi ntambara, ndetse hari ukuburira ko akaga kurushaho kari imbere.
Ahavuye isanamu, Getty Images
