Tanzania: Abantu 10 bapfiriye mu mpanuka y'ubwato muri Zanzibar
Ibikorwa by'ubutabazi byahagaze nyuma yuko Kasim Khalfan ukuriye itsinda ry'abibira mu mazi ryo mu kigo KMKM cy'ubutabazi yemeje ko amakuru rifite ubu agaragaza ko nta gihamya ihari yuko hari abandi bantu bakiburiwe irengero mu mpanuka y'ubwato.
Ubu bwato ku wa kabiri bwakoreye impanuka mu birwa (amazinga mu Kirundi) bya Zanzibar muri Tanzania. Bwari burimo kwerekeza ku kirwa cya Panza buvuye i Pemba. Abagenzi bari baburimo bari bagiye mu muhango wo gushyingura.
Mu ijoro rya mbere iyo mpanuka iba, imirambo 10 ni yo yatahuwe naho abandi bantu 10 baratabarwa bakiri bazima. Ariko ku munsi wa kabiri itsinda ry'ubutabazi nta wundi muntu ryabonye.
Abategetsi bo muri ako karere bari basabwe gutanga amakuru mu gihe baba babonye ko hari umuntu n'umwe ubura, ariko basanga nta wundi muntu urimo kubura.
Abo mu miryango yabuze abayo baracyari mu cyunamo, mu gihe imirambo yose uko ari 10 yamaze gushyingurwa.
Abarokotse bavuga ko moteri y'ubu bwato yazimye inshuro ebyiri, nuko ubwato butangira kurohama.
Amour Nassor wari uri mu bwato avuga ko yabonye mwishywa we atera hejuru atabaza mbere yuko apfa.
Abatuye muri ako karere bavuga ko itsinda ry'ubutabazi ryo mu kigo KMKM ryahageze ricyererewe cyane nubwo ibiro by'icyo kigo byegereye ahabereye iyo mpanuka, ndetse ko benshi mu barokotse batabawe n'abibira mu mazi bo muri ako gace.
