Impunzi zavuye muri Libya zikajyanwa mu Rwanda zamaze gutuzwa i Burayi no muri Canada

Inyandiko gusa
Icyiciro cya karindwi cyageze mu Rwanda kuwa kane nijoro nibo bari benshi kurusha ibindi byiciro byabanje

Ahavuye isanamu, Rwanda Emergency Ministry

Insiguro y'isanamu, Icyiciro cya karindwi cyageze mu Rwanda kuwa kane nijoro nibo bari benshi kurusha ibindi byiciro byabanje

Mu ijoro ryo kuwa kane icyiciro cya karindwi cy'impunzi 176 zivanywe muri Libya cyageze mu Rwanda, nk'uko bitangazwa na minisiteri y'ubutabazi.

Kuva muri Nzeri (9) 2019 u Rwanda rumaze kwakira impunzi 648 zari zaraheze muri Libya, muri bo 462 bamaze kujyanwa mu bihugu by'i Burayi na Canada.

Abaraye bageze i Kigali bakomoka mu bihugu bya Eritrea (102), Sudani (62), Somalia(5), Sudani y'Epfo (4) na Ethiopia(3).

Muri Nzeri 2019, Perezida Paul Kagame yabwiye inama rusange y'umuryango w'abibumbye (UN) ko kwakira abaheze muri Libya ari "ikimenyetso ko muri Afurika naho hava ibisubizo".

PS Imberakuri, ishyaka ritavuga rumwe n'ubutegetsi - igice kitemewe n'amategeko - ryavuze ko u Rwanda rudakwiye kwakira izi mpunzi kuko leta "ihonyanga uburenganzira bwa muntu harimo n'ubw'impunzi".

Imibare ya Minisiteri y'ubutabazi igaragaza ko mu mpunzi zimaze kuhagera 462 bimuriwe mu bihugu bya Sweden (134), Canada(129), Norway(107), Ubufaransa(66), no mu Bubiligi(26).

Mu cyiciro cya mbere cyageze mu Rwanda muri Nzeri umuto muri yari Hadia wari ufite amezi abiri, yavukiye mu kigo bari bacumbikiwemwo muri Libya

Ahavuye isanamu, @UNHCRLibya

Insiguro y'isanamu, Mu cyiciro cya mbere cyageze mu Rwanda muri Nzeri umuto muri yari Hadia wari ufite amezi abiri, yavukiye mu kigo bari bacumbikiwemwo muri Libya

Aho izi mpunzi zicumbikirwa i Nyamata muri 40Km uvuye i Kigali, havukiye abana 11 naho abandi babiri muri zo barapfuye, kuva batangiye kuhagera mu 2019.

Ishami rya UN ryita ku mpunzi rivuga ko impunzi zirenga 5,000 zirimo abana amagana, zikiri mu bice bitandukanye bya Libya aho zaheze mu rugendo rwo kujya gushaka ubuzima hakurya y'inyanja ya Mediterane i Burayi.

Skip Ibisomwa cane and continue reading
Ibisomwa cane

End of Ibisomwa cane

UN ivuga ko impunzi zirenga 6,919 zimaze kuvanwa muri Libya cyangwa gutuzwa mu bindi bihugu kuva mu 2017.