Ethiopia – Tigray: Inyeshyamba zihakana kugaba igitero ku ivuriro cyiciwemo abantu

Inyeshyamba zo mu karere ka Tigray mu majyaruguru ya Ethiopia zahakanye kugaba igitero ku kigo nderabuzima (ivuriro) cyo mu karere ka Afar, cyiciwemo abantu batari munsi ya 12.

Ubutegetsi bw'akarere ka Afar bwegetse icyo gitero ku nyeshyamba zo muri Tigray, mu gihe imirwano imaze amezi icyenda muri Tigray irimo gukaza umurego igera mu turere duhana imbibi na Tigray.

Muganga wo mu karere ka Afar yabwiye BBC ko abo bantu 12 bapfuye bazize ibikomere bagiriye mu gitero cy'imbunda za rutura cyagabwe ku kigo nderabuzima cya Galikoma.

Abandi bantu bagera hafi kuri 30, bagizwe n'abagabo, abagore n'abana, bacyeneye ubuvuzi bwihutirwa.

Umuvugizi w'ubutegetsi bw'akarere ka Afar yavuze ko hari abandi baturage b'abasivile benshi bapfiriye ahabereye icyo gitero, ariko nta mubare wabo yatanze.

Yavuze ko inyeshyamba zo muri Tigray ari zo zakoze icyo gitero. Ariko umuvugizi w'umutwe Tigray People's Liberation Front (TPLF) yanditse kuri Twitter ko amakuru y'icyo gitero "ahangayikishije".

Uyu muvugizi wa TPLF yahakanye avuga ko nta ruhare izi nyeshyamba zagize muri icyo gitero, avuga ko ziteguye gufatanya n'iperereza iryo ari ryo ryose ryakorwa kuri icyo gitero.

Icyo kigo nderabuzima cyakoreshwaga nk'icumbi ku bantu bavuye mu byabo ndetse kikanabikwamo imfashanyo y'ibiribwa.

Mu cyumweru gishize, Martin Griffiths, umukuru w'ibikorwa byo gutanga imfashanyo mu muryango w'abibumbye (ONU/UN), yasuye Ethiopia, avuga ko abaturage bo mu karere ka Afar bakuwe mu byabo n'imirwano iherutse kuba bagera ku 54,000.

Inyeshyamba za TPLF, ubu zirwanira mu mutwe uhuriwemo n'indi mitwe yitwaje intwaro yo muri Tigray, wa Tigray Defence Forces ( (TDF).

Mu kwezi kwa gatandatu, leta ya Ethiopia yatangaje agahenge ku ruhande rwayo nyuma yuko inyeshyamba zigaruriye ibice byinshi, birimo no kwisubiza umurwa mukuru Mekelle wa Tigray.

Ishyaka rya TPLF ni ryo ryari ku butegetsi mu karere ka Tigray mbere yuko rihirikwa n'ingabo za leta ya Ethiopia mu kwezi kwa cumi na kumwe mu 2020.

Leta ya Ethiopia ivuga ko TPLF ari umutwe w'iterabwoba, mu gihe inyeshyamba za TPLF zo zivuga ko ari zo leta y'akarere ka Tigray yemewe n'amategeko.

Abakuru ba TPLF bashwanye na Minisitiri w'intebe wa Ethiopia Abiy Ahmed ku bijyanye n'amavugurura muri politiki, nubwo kuba TPLF yarafashe ibigo bya gisirikare by'ingabo za leta byo muri Tigray ari yo yabaye imbarutso y'igitero leta yayigabyeho.