Suez Canal: Ba nyiri ubwato bwafunze inzira y'ubu bunigo basabye imbabazi
Ahavuye isanamu, EPA
Kompanyi yo mu Buyapani nyiri ubwato rutura bw'ubwikorezi bwafunze inzira mu bunigo bwa Suez kuva kuwa kabiri yasabye imbabazi kuko bwahungabanyije ubucuruzi ku isi.
Shoei Kisen Kaisha yavuze ko kugobotora ubu bwato bwitwa Ever Given aho bwahagamye "biboneka ko bigoye cyane", ariko iri "gukora cyane ngo ikemure ikibazo".
Ubu bwato bw'uburebure bwa 400m bwahagamye bwitambitse mu nzira y'ubunigo bwa Suez nyuma yo guhutazwa n'umuyaga ukomeye.
Nibura amato agera ku 150 ajya mu byerekezo byombi ategereje ko ubu bwato butanga inzira.
Hafi 12% by'ibicuruzwa byo ku isi bica muri iyi nzira ya 193Km ihuza inyanja Itukura n'iya Mediterane, ikaba iya bugufi ishoboka ihuza Aziya n'Uburayi mu mazi.
Uyu munsi kuwa kane, amato umunani akora akazi ko gusunika ubwato bunini bwahagamye yakomeje umuhate wo kugobotora Ever Given ngo buve mu nzira.
Inzobere yo mu kigo cy'ubutabazi iri gukora iki gikorwa yaburiye ko kwigizayo ubu bwato bishobora gufata ibyumweru kandi kontineri bwikoreye nazo zishobora gupakururwa kugira ngo bworohe.
Peter Berdowski ukuriye ikigo Boskalis yabwiye Televiziyo yo mu Buholandi ati: "Ntawakwirengagiza ko bishobora gufata ibyumweru, bitewe n'uko ibintu bimeze."
"Ni ibiro byinshi cyane byaheze mu mucanga. Dushobora gufatanya; amato asunika, kwigizayo umucanga no kugabanya uburemere tuvanaho kontineri, amavuta n'amazi biri mu bwato."
Ubu bwato bwa toni 200,000 z'uburemere bwanditse muri Panama bugakoreshwa na kompanyi y'ubwikorezi yo muri Taiwan Evergreen Marine, bwari bugiye i Rotterdam mu Buholandi buvuye mu Bushinwa.
Kuwa kabiri nijoro bwahutajwe n'umuyaga ukomeye buhagama ku nkombe bwitambitse bufunga inzira y'ubunigo bwa Suez.
Shoei Kisen Kaisha, kompanyi nyiri ubu bwato, ivuga ko abakozi 25 ba Ever Given bose bo mu Buhinde, nta kibazo bafite kandi butigeze bugira ikibazo cyo kumena amavuta.
Mu 2017, ubundi bwato bw'Abayapani bwikorera za kontineri bwafunze ubu bunigo mu buryo nk'ubu, bitewe n'ikibazo cya mekanike.
Leta ya Misiri yohereje amato yo gusunika buvanwamo mu gihe cy'amasaha.
