Covid-19: Kuwa kane hakingiwe abaperezida batatu ba Africa

Inyandiko gusa
Perezida Paul Kagame aterwa urukingo kuwa kane ku bitaro by'Umwami Faisal i Kigali

Ahavuye isanamu, Rwanda Presidency

Insiguro y'isanamu, Perezida Paul Kagame aterwa urukingo kuwa kane ku bitaro byitiriwe Umwami Faisal i Kigali

OMS/WHO ivuga ko ibihugu 19 muri Africa byatangiye gukingira Covid-19 aho doze zigera ku 518,000 zimaze guterwa abantu, mu gihe hari abashidikanya ubuziranenge bw'izi nkingo abakuru b'ibihugu bimwe bari gutanga ingero ko bakingiwe.

Kugeza kuwa gatatu, ibihugu 22 bya Africa byari bimaze kugerwaho na doze miliyoni 14.8 z'inkingo zo muri gahunda ya Covax, nk'uko Dr Matshidiso Moeti ukuriye WHO/OMS muri Africa abivuga.

Africa CDC, ibigo bishinzwe kurwanya ibyorezo by'ubumwe bwa Africa, ivuga ko nubwo hari ikigereranyo kinini cyo kwemerwa kw'izi nkingo, hari n'abatari bacye bazishidikanya n'abatazemera.

Perezida Lazarus Chakwera akingirwa kuwa kane

Ahavuye isanamu, Malawi State House

Insiguro y'isanamu, Perezida Lazarus Chakwera akingirwa kuwa kane yavuze ko ari mu bambere bakingiwe muri Malawi ngo "yerekane ko urwo rukingo rwizewe"

Kuwa kane gusa, ba Perezida Paul Kagame w'u Rwanda, Lazarus Chakwera wa Malawi na Adama Barrow wa Gambia biyerekanye baterwa inkingo za Covid-19 zageze mu bihugu byabo.

Mu kwezi gushize Africa CDC yatangaje ko abasubije mu bihugu 15 byakozwemo ubushakashatsi bavuga ko "bakemanga ubuziranenge bw'inkingo nshya za Covid-19 ugereranyije n'inkingo zisanzwe."

Africa CDC ivuga ko biterwa n'uko hari amakuru atari ukuri kuri izi nkingo akwirakwizwa cyane, kandi "benshi mu bagerwaho n'ibihuha nabo bakagaragaza ikigero kiri hejuru cyo kubyizera."

Perezida Adama Barrow akingirwa ejo kuwa kane

Ahavuye isanamu, State House Banjul

Insiguro y'isanamu, Perezida Adama Barrow kuwakane niwe wahereweho mu gutangiza gahunda yo gukingira muri Gambia

Muri Kenya na Uganda, bamwe mu baturage batangarije ibinyamakuru byaho ko batazikingiza Covid-19 niba ba perezida b'ibi bihugu batagaragaye nabo baterwa uru rukingo.

Ibihugu bimwe hanze ya Africa byahagaritse by'agateganyo gutera abantu urukingo rwa AstraZeneca - rwiganje mu zahawe ibihugu byinshi bya Africa - kubera impungenge z'ubuziranenge, kimwe mu bindi biri kuzamura gushidikanya n'ibihuha ku nkingo.

Skip Ibisomwa cane and continue reading
Ibisomwa cane

End of Ibisomwa cane

Muri uku kwezi, Perezida Nana Akufo-Addo wa Ghana yakingiwe kumugaragaro, ahita anyomoza ibihuha bivuga ko inkingo za Covid-19 zaje kumaraho abanyafurika byavugwaga muri icyo gihugu.

Jane Ruth Aceng minisitiri w'ubuzima wa Uganda atangiza gahunda yo gukingira kuwa kane

Ahavuye isanamu, Getty Images

Insiguro y'isanamu, Jane Ruth Aceng minisitiri w'ubuzima wa Uganda atangiza gahunda yo gukingira kuwa kane

Abandi bategetsi nka Perezida wa Africa y'Epfo, uwa Senegal na Visi Perezida wa Zimbabwe bikingije kumugaragaro mu gutanga urugero kuri rubanda ko bizeye izi nkingo.

Muri Africa, abantu hafi miliyoni enye nibo bamaze gutangazwa ko banduye Covid-19 mu gihe abo yishe bagera ku 106,000, nk'uko Africa CDC ibivuga.