Rwanda – Gukingira Covid: Charles Michel avuga ko 'nta wuzaba atekanye twese tudatekanye'

Inyandiko gusa
Perezida w'inama y'umuryango w'ubumwe bw'Uburayi Charles Michel ku cyumweru yakiriwe na Perezida Paul Kagame

Ahavuye isanamu, Rwanda Presidency

Insiguro y'isanamu, Perezida w'inama y'umuryango w'ubumwe bw'Uburayi Charles Michel ku cyumweru yakiriwe na Perezida Paul Kagame

Jean Claude Mwambutsa/BBC Gahuzamiryango i Kigali

Perezida w'inama itegeka umuryango w'ubumwe bw'Uburayi (EU) Charles Michel uri mu ruzinduko mu Rwanda, ku gukingira Covid-19 yavuze ko "nta uzaba atekanya ku isi igihe twese tudatekanye".

Michel wahoze ari minisitiri w'intebe w'Ububiligi (2014 - 2019) yavuze ko iyo ariyo mpamvu EU yatanze inkunga kuri gahunda ya Covax igamije gukwirakwiza inkingo kuri bose ku isi.

Gusa ishami rya UN/ONU rishinzwe ubuzima ku isi OMS/WHO ryanenze ibihugu bikize kugura inkingo nyinshi cyane, no gushaka kunaniza umugambi wa Covax ku isoko ryazo.

Charles Michel ku cyumweru yasuye ibikorwa byo gukingira mu burasirazuba bw'u Rwanda.

Mu Rwanda abantu hafi 200,000 bamaze guterwa doze ya mbere y'urukingo rwa Covid-19 nyuma y'iminsi itatu gukingira bitangiye, nk'uko minisiteri y'ubuzima ibivuga.

Kuwa mbere mu kiganiro n'abanyamakuru i Kigali, Michel avuga ku kuboneka kw'inkingo za Covid-19 yagize ati: "Covid-19 ni ikibazo gikomereye isi yose, nta uzaba atekanye twese tudatekanye".

Avuga ko kubera iyo mpamvu EU yateye inkunga Covax kandi "yagize ibyihutirwa gukorana n'abafatanyibikorwa bacu muri Africa no mu Rwanda".

Skip Ibisomwa cane and continue reading
Ibisomwa cane

End of Ibisomwa cane

Michel, ku cyumweru wakiriwe na Perezida Paul Kagame, yavuze ko yashimye uko yabonye gukingira biri gukorwa mu Rwanda.

Charles Michel (inyuma ibumoso) ari kumwe na depite mu nteko ya EU Chrysoula Zacharopoulou (uri gutera urukingo) n'umunyamabanga mukuru wa Francophonie Louise Mushikiwabo (wa gatatu uvuye iburyo) ku cyumweru 07 03 2021 basuye ibikorwa byo gukingira mu Bugesera

Ahavuye isanamu, Rwanda health

Insiguro y'isanamu, Charles Michel (inyuma ibumoso), depite mu nteko ya EU Chrysoula Zacharopoulou (uri gutera urukingo) n'umunyamabanga mukuru wa Francophonie Louise Mushikiwabo (wa gatatu uvuye iburyo) ku cyumweru basuye ibikorwa byo gukingira mu Bugesera

Abjijwe n'abanyamakuru icyo avuga ku kibazo cya Paul Rusesabagina kiri mu rukiko, Michel yavuze ko ntacyo yakivugaho.

Inteko ishinga amategeko ya EU mu kwezi gushize yavuze ko "yamaganye ishimutwa n'iyoherezwa mu Rwanda ridakurikije amategeko rya Paul Rusesabagina."

Ibi byamaganywe n'inteko ishingamategeko y'u Rwanda mu gisubizo yahaye iy'uburayi.