Luca Attanasio: Tshisekedi arohereza intumwa ijyanye ibaruwa ye bwite mu Butaliyani

Itsinda rivuye mu biro bya perezida wa Repubulika ya demokarasi ya Congo rirajya i Goma gufasha iperereza ku iyicwa rya ambasaderi w'Ubutaliyani.

Iryo tsinda rirahaguruka i Kinshasa none kuwa kabiri kandi rizajya riha raporo perezida wa repubulika ubwe.

Itangazo rya perezidansi ya DR Congo rivuga kandi ko "intumwa ya perezida ijya mu Butaliyani ku itariki 23 - 02 gutanga ibaruwa bwite ya perezida igenewe perezida w'Ubutaliyani".

Umunyamabanga mukuru w'umuryango w'abibumbye Antonio Guterres yasabye ko "haba iperereza ryihuse" kandi abakoze icyo gitero "bagashyikirizwa ubucamanza".

Mu butumwa yatangaje kuri Twitter, Perezida Félix Tshisekedi yavuze ko ari gukurikirana byihariye iyicwa rya ambasaderi w'Ubutaliyani, Luca Attanasio.

We n'abandi bantu babiri mu bari kumwe nawe bishwe mu gitondo cyo kuwa mbere n'abantu bitwaje intwaro hafi y'ahitwa Kibumba ku muhanda wa Goma-Rutshuru, abategetsi muri DR Congo bavuga ko wari umugambi wo gushimuta utaragezweho.

Perezida Tshisekedi yamaganye iki gitero cyigabije urukurikirane rw'imodoka zarimo imwe ya PAM itwaye ambasaderi Attanasio.

Tshisekedi yasabye inzego zibishinzwe kugaragaza neza ibyabaye mu gihe cya vuba gishoboka, kugira ngo ababikoze bamenyekane kandi bashyikirizwe ubucamanza.

Abategetsi ba DR Congo bashinja umutwe urwanya ubutegetsi bw'u Rwanda, FDLR, ko ariwo wakoze iki gitero, FDLR yahakanye uruhare muri icyo gitero.

Agace kegereye ibirunga iki gitero cyabereyemo kavugwamo imitwe itandukanye yitwaje intwaro.

Abashinzwe umutekano muri Kivu ya ruguru bavuga ko batari bamenyeshejwe ko ambasaderi Attanasio ari muri ako gace.

Kugeza ubu kandi nta makuru arambuye aratangazwa ku mpamvu ambasaderi Attanasio yari aho hantu.