Amatora muri US: Ubushinwa bwashimiye Biden ku ntsinzi nyuma y'iminsi bwifashe

Ubushinwa nabwo bwashimiye Joe Biden ko ari we ubu biboneka ko yatsinze amatora ya perezida wa Amerika, ni nyuma y'iminsi bwo bwarifashe.

Umuvugizi wa minisiteri y'ububanyi n'amahanga y'Ubushinwa yavuze ko "twubashye amahitamo y'abaturage ba Amerika. Twifurije kwishyuka Bwana Biden na Madamu Harris".

Ubushinwa na Amerika bimeze igihe kinini bibanye nabi. Ubushyamirane bwarushijeho kwiyongera mu bihe bya vuba ku; ubucuruzi, ubutasi n'icyorezo cya Covid-19.

Uburusiya bwo ntiburagira icyo buvuga ku watsinze aya matora muri Amerika.

Mu myaka ine ishize, Perezida Vladimir Putin w'Uburusiya yabaye mu ba mbere bifurije Donald Trump kwishyuka ubwo byari bivuzwe ko yatsinze, gusa ubu kuri Biden bwarifashe.

Dmitry Peskov umuvugizi w'ibiro bya Kremlin yabwiye abanyamakuru ati: "Twibaza ko ibyiza ari ugutegereza ibyavuye mu matora byemewe n'amategeko".

Kuva kuwa gatandatu ubwo byavugwaga n'ibitangazamakuru bikomeye muri Amerika ko biboneka ko yatsinze, Biden yakomeje kwakira ubutumwa na telephone z'abategetsi banyuranye bo ku isi.

Perezida Donald Trump we akomeje kuvuga ko yibwe amajwi, nubwo aterekana ibimenyetso.

Ubutumwa bw'Ubushinwa buvuze iki?

Ibi ni ibihugu bibiri bikomeye mu bukungu, ubucuruzi n'igisirikare ku isi, kandi muri iki gihe biri mu ihiganwa ry'ubukaka muri ibyo.

Mu buryo bweruye, ibi byerekana ko Ubushinwa - by'umwihariko Perezida Xi Jinping - bwemera ibyavuye muri aya matora, nubwo Perezida Donald Trump ashaka ko bikiranurwa n'ubucamanza.

Gusa nyuma y'ubutumwa bushimira Biden, umuvugizi w'ububanyi n'amahanga w'Ubushinwa yongeyeho ati: "Twumvise ko ibyavuye mu matora ya Amerika bizagenwa n'amabwiriza n'amategeko ya Amerika."

Intambara y'ubucuruzi hagati y'ibi bihugu yatangijwe na Donald Trump yangije imibanire yabyo, ndetse kenshi yise Covid-19 "virusi y'Ubushinwa" cyangwa "kung flu".

Uwo Ubushinwa bwifuzaga kubona muri White House cyari ikibazo kibazwa cyane mbere y'aya matora. Amakuru y'ubutasi bwa Amerika yibazaga ko ishyaka rya gikomunisti ry'Ubushinwa ryifuza Biden.

Ariko Professor Yan Xuetong, wo muri kaminuza ya Tsinghua i Beijing, avuga ko Ubushinwa bwifuzaga kubona Trump ategeka indi myaka ine.

"Atari uko Trump azorohera inyungu z'Ubushinwa, ahubwo kuko azangiza Amerika kurusha Ubushinwa." Nk'uko Professor Xuetong yabibwiye BBC mbere y'aya matora.

Ni ibihe bihugu bindi bitaragira icyo bivuga?

Uburusiya

Umunyamakuru wa BBC Steve Rosenberg uri i Moscow avuga ko kuba Uburusiya ntacyo buravuga byerekana uburyo Kremlin idashishikajwe n'ibyavuye muri aya matora.

Biden ni umuntu unenga yeruye Moscow kandi mu gihe gito gishize yavuze ko Uburusiya ari cyo kibazo gikomeye kurusha ibindi kuri Amerika.

Trump ni gacye cyane yumvikanye anenga Uburusiya cyangwa Putin, Uburusiya kandi bwashinjwe kwivanga mu matora ya 2016 yagejeje Trump ku ntsinzi.

Brazil

Perezida Jair Bolsonaro kenshi afatwa nk'inshuti ya Trump, ndetse kugeza ubwo bamwe bamwita "Trump of the Tropics".

Kuba umutegetsi wa Brazil ntacyo aravuga ku ntsinzi ya Joe Biden, ntabwo bitunguranye.

Ibinyamakuru byo muri Brazil bivuga ko amakuru bikesha abantu bo muri leta ari uko Bwana Bolsonaro azategereza ko ibirego bya Trump mu nkiko birangira.

Kuwa kane, ubwo yari abajijwe kuri ibi, Bolsonaro yarasubije ati: "Ariko se byararangiye? amatora yari yarangira?"

Korea ya ruguru

Umutegetsi w'ikirenga wa Korea ya ruguru ntacyo aravuga ku byavuye mu matora ya Amerika

Mu 2016, nyuma y'iminsi micye bitangajwe ko yatsinze iki gihugu cyemeye kinashimira Donald Trump ku ntsinzi.

Trump na Kim bagiranye umubano urimo ituze n'imiraba, hari ubwo byabaga byifashe nabi ariko bombi baravuganye ndetse bahuye inshuro eshatu imbona nkubone.

Biden we yise Kim igihazi kandi yavuze ko nta bushake na bucye afite bwo kuganira na Kim ubwe. Kim we yise Biden "umusazi ufite ubwenge bucye".