Mali: Abatavuga rumwe na leta baramagana 'kwiharira ubutegetsi' kw'abasirikare

Urugaga rw'abatavuga rumwe n'ubutegetsi muri Mali rwayoboye imyigaragambyo yabanjirije ihirikwa ry'ubutegetsi ryo mu kwezi gushize kwa munani, rwanze amasezerano ajyanye n'inzibacyuho (cyangwa imfatakibanza mu Kirundi).

Ku wa gatandatu, abakuru b'agatsiko k'abasirikare kafashe ubutegetsi bemeye leta y'inzibacyuho y'amezi 18 kugeza habayeho amatora.

Ayo masezerano ku nzibacyuho yagezweho nyuma y'iminsi itatu y'ibiganiro n'abatavuga rumwe n'ubutegetsi ndetse n'amatsinda ategamiye kuri leta.

Ariko urwo rugaga rw'abatavuga rumwe n'ubutegetsi - ruzwi nka 'Mouvement du 5 Juin-Rassemblement des Forces Patriotiques (M5-RFP)' - rwitabiriye ibyo biganiro, rwanze ibikubiye mu nyandiko y'ibyemeranyijweho.

M5-RFP ivuga ko ibiyirimo ari igerageza ry'abakuru b'agatsiko k'abasirikare ryo "gufata no kwiharira ubutegetsi".

Urwo rugaga rwongeyeho ko iyo nyandiko ititaye no ku cyo ruvuga ko ari amatora ku bwiganze yuko habaho umutegetsi w'umusivile kandi ko ibiri muri iyo nyandiko "bitagaragaza ibitekerezo n'ibyemezo by'abaturage ba Mali".

Umuryango w'ubukungu w'ibihugu byo muri Afurika y'uburengerazuba (CEDEAO/ECOWAS) nawo wari wasabye ko perezida w'inzibacyuho aba ari umuturage w'umusivile, ariko agatsiko k'abasirikare kavuga ko umusivile cyangwa umusirikare ashobora kuba perezida.

Amasezerano ku nzibacyuho yatangajwe n'abakuru b'agatsiko k'abasirikare, yanavuze ko hazashyirwaho inteko ishingamategeko y'inzibacyuho izaba irimo n'abo mu rugaga M5-RFP.

Mali isanzwe iri kugorwa n'ibibazo by'urugomo rw'intagondwa zigendera ku mahame akaze ya kisilamu n'urugomo rushingiye ku moko, ndetse n'ubukungu bucumbagira.

Umunyamakuru wa BBC Mary Harper avuga ko amakimbirane akomeye hagati y'igisirikare n'itsinda ryayoboye imyigaragambyo yabanjirije ihirikwa ry'ubutegetsi bwa Perezida Ibrahim Boubacar Keïta, ateje inkeke ko harushaho kubaho umutekano mucye mu gihugu.