Ubushakashatsi ku zuba bwerekanye amafoto ya mbere yo hafi cane yerekana 'imbeya z'umuriro'

Amasanamu mashasha y'izuba yafatiwe ku birometero imiliyoni 77 niyo ya mbere ashoboye gufatwa n'amakamera mu buryo bwa hafi.

Yavuye mu bushakashatsi bwakozwe n'ikigendajuru Solar Orbiter (SolO) cegukira ikigo ca Bulaya kijejwe ibirere, carungitswe mu kirere mu ntango z'uyu mwaka.

Mu makuru yegeranijwe n'ikinyamakuru co mu Bwongereza kuri iki kigendajuru yerekana udushwarara duto duto cane twataziriwe "imbeya z'umuriro".

Utu ni uduce dutoya cane tw'izuba duharurwa muri za miliyoni nyinshi cane ivyuma vyihweza izuba biri kw'isi bishobora kubona buri munsi.

Twuzuye hose nk'utudomo, utu tubeya tw'umuriro tugira uruhare rutangaje rwo gushusha igice c'inyuma (surface) c'izuba bita corona, kigashuha gusumba igice c'imbere mu zuba ku ncuro zirenga 500.

Ikigo c'ubushakashatsi Mullard Space Science Laboratory cegukira ishure kaminuza ya Londres gisigura kiti: "Turabandanya dukora ubushakashatsi gusumba, uko ikigendajuru Solar Orbiter kizogenda cegera izuba".

Iki kigendajuru cegukira ikigo ca Bulaya kijejwe ikirere (Esa) carungikiwe mu kirere muri Amerika mu kwa kabiri, kikaba gifise igikorwa co kwerekana ibinyegezwa biri kuri iki kinyenyeri cacu n'ibikigize.

Imishwarara y'izuba igira ingaruka zikomeye kw'isi gusumba kure cane umuco n'ubushuhe burikomokako.

Akenshi, iyo mishwarara ironona; uduce turimwo ubumara kandi turimwo inguvu z'isumaku iyo duturitse turashika ku bigendajuru kandi tukagira ingaruka mbi mu bijanye no gutumatumanako amakuru ku buryo bwa radio.

Iki kigendajuru SolO kirashobora gufasha abahinga gutahura neza ibijanye n'izi ngaruka.

Umuyobozi ajejwe ubuhinga ku kigo c'Ubwongereza gishinzwe ibirere, Dr Caroline Harper agira ati: "Ibintu biherutse kuba kuri coronavirus birerekana ko ari ngombwa kwama duhanahana amakuru, kandi ibigendajuru bikaba biri mu vyofasha".

"Rero, ni ngombwa rwose ko tumenya vyinshi ku bijanye n'izuba kugira ngo dushobore kuronka amakuru y'ikirere caryo, nk'uko twashoboye kubikora mu kumenya n'isi n'ikirere cayo".

Solar Orbiter yashizwe ku murongo uzunguruka izuba ikazogenda iryegera bukebuke - gushika ku kilometero biri munsi y'imiliyoni 43.

Ivyo bizotuma SolO ishobora kwinjira mu muzunguruko w'umubumbe wa Mercure.

Amashusho yerekanywe ku wa kane ni ayafashwe hagati mu kwa gatandatu, akaba yafashwe igihe ikigendajuru cari mu mu muzunguruko w'umubumbe wa Venus.

Ugereranije, isi ihagaze hafi ku birometero imiliyoni 149 kuva kw'izuba.

Umuhanuza mukuru wa Esa ashinzwe n'ubushakashatsi, Prof Mark McCaughrean, yabwiye BBC ati:

"Solar Orbiter ntabwo yegereye izuba kugira ngo ifate amasanamu ya hafi gusa: iragenda yegereza kwinjira mu bice bitandukanye, bidahungabanywa n'umuyaga w'izuba, wiga ibice hamwe n'inguvu z'isumaku mu mwanya wo nyawo kandi iri hafi, muri uwo mwanya nyene yegeranya amakuru y'ikirere kizungurutse izuba. Nta kindi kigendajuru kindi gishobora kubikora".