Mohamed Salah avuga ko ashaka kuguma muri Liverpool 'igihe kirekire'

Rutahizamu Mohamed Salah avuga ko ashaka kuguma muri Liverpool "igihe kirekire" ndetse atekereza ko iyi kipe ishobora kugera ku" bindi bintu bikomeye".

Salah w'imyaka 28 ni we watsindiye Liverpool ibitego byinshi muri uyu mwaka w'imikino, anayifasha kwegukana igikombe cya shampiyona yaherukaga mu myaka 30 ishize.

Uyu Munyamisiri yageze muri Liverpool mu mwaka wa 2017. We n'ikipe ye ya Liverpool banatwaye igikombe cya Champions League i Burayi n'igikombe cy'isi gihuza amakipe (clubs).

Yabwiye igitangazamakuru BeIN Sports ati: "Sinabona uko nsobanura ukuntu niyumvise muri jye nyuma yaho dutsindiye shampiyona nyuma y'imyaka 30 yari ishize".

"Ndishimye cyane. Nezezwa n'umwuka uri hano. Nkunda aha hantu kandi nizeye kuzahaguma igihe kirekire".

"Umwuka uri hano utandukanye n'uw'ahandi hantu aho ari ho hose".

Salah amaze gutsinda ibitego 92 mu mikino 145 amaze gukina kuva yagera muri Liverpool, harimo ibitego 21 yatsinze mu mikino 41 muri uyu mwaka w'imikino.

Mu kwezi kwa karindwi mu mwaka wa 2018, yashyize umukono kuri kontaro nshya y'imyaka itanu, ariko rimwe na rimwe byagiye bivugwa ko ashobora kuva muri Liverpool akaba yajya mu yindi kipe imuhemba menshi kurushaho.

Liverpool, yamaze kwegukana igikombe mu cyumweru gishize, irusha Manchester City iyikurikiye amanota 23, mu gihe isigaje gukina imikino irindwi.

Biranashoboka ko ishobora guca umuhigo w'amanota menshi muri shampiyona ya Premier League, usanzwe ufitwe na Manchester City bazakina ejo ku wa kane.

Salah yongeyeho ati: "Twamenyeranye neza nk'ikipe kandi turumvikana neza".

"Niba ibi bikomeje, dushobora kugera ku bindi bintu bikomeye. Biragoye kuguma ku rwego rwacu rw'ubu rw'imikinire, ariko ibyo ntibivuze ko bidashoboka".