Coronavirus - Burundi: “amakuru atangwa ashobora kuba ari kure y’ukuri” - OLUCOME
Ahavuye isanamu, Getty Images
Olucome, ishyirahamwe ritegamiye kuri leta rigamije kurwanya ruswa n'isesagurwa ry'umutungo w'igihugu mu Burundi rinenga leta ko ititaye ku cyorezo, rivuga ko "n'ingamba zidahagije zari zarafashwe zitagikurikizwa n'Abarundi, n'abashinzwe gutuma zikurikizwa".
Iri shyirahamwe rivuga ko amatangazo ya minisiteri y'ubuzima kuri iki cyorezo "nta buryo na bumwe yakwizerwa", kandi ko ritabona iyi minisiteri ivuga kenshi umubare w'abanduye n'ingamba leta yafashe.
Mu itangazo wasohoye uyu munsi kuwa kabiri, Olucome ivuga ko "bibi kurushaho abategetsi bakorera abaturage ntacyo bavuga [kuri iki cyorezo] mu butumwa bagenera abaturage".
Ku bivugwa na Olucome, umuvugizi wa guverinoma y'u Burundi yasubije BBC mu nyandiko ko "Guverinoma idasubiza iyo ibisabwe isubiza kuri 'programme'".
BBC yagerageje kuvugana na leta y'u Burundi kuri ibi kugeza ubu ntibyashoboka.
Mu Burundi, mu matangazo yatanzwe na minisiteri y'ubuzima biboneka ko hamaze kuboneka abantu 62 banduye coronavirus na 33 bayikize.
Mu kwezi gushize kwa gatanu, minsiteri y'ubuzima mu Burundi yatangazaga rimwe mu cyumweru imibare mishya n'amakuru kuri coronavirus.
Muri ayo matangazo biboneka ko hamaze gufatwa ibipimo byose hamwe bisatira 1,000.
Olucome ivuga ko ihereye ku itangazo riheruka gutwangwa ibona amakuru "atangazwa ashobora kuba ari kure y'ukuri kw'ibyo Abarundi batekereza", igasaba leta y'u Burundi "kureka kwigiza nkana [kwizimagiza] imbere y'icyorezo kiri kwica abantu ku isi".
