Coronavirus: Tanzania yahamagaje umutegetsi wo muri ambasade y'Amerika ngo yisobanure

Leta ya Tanzania yaraye ihamagaje uwungirije ambasaderi wa Leta Zunze Ubumwe z'Amerika muri icyo gihugu nyuma yaho iyo ambasade iburiye Abanyamerika baba muri Tanzania kwirinda gukora ingendo kubera coronavirus.

Mu byumweru bibiri bishize, iyo ambasade yaburiye Abanyamerika baba muri Tanzania ko ibyago byo kwandura coronavirus mu mujyi wa Dar es Salaam biri hejuru.

Ibyo biro by'uhagarariye Amerika muri Tanzania byanabwiye Abanyamerika ko ibitaro by'i Dar es Salaam n'ahandi mu gihugu byarengewe ubushobozi kubera umubare munini w'abarwayi.

Ibyo Amerika yabitangaje mu gihe amakuru mashya ava muri leta ya Tanzania ajyanye n'uko icyorezo cya coronavirus gihagaze akomeje kuba ingume.

Ibyo byatumye Abanyatanzania bashishikarira ubwo butumwa bwatangajwe n'ibiro by'uhagarariye Amerika muri Tanzania.

Ubwo butumwa ntibwanavuzweho rumwe kubera ko butatanze gihamya y'ibibukubiyemo.

Ariko, kuburira ku kivugwa ko ari umubare uri hejuru w'abanduye coronavirus no kuvuga ko inzego z'ubuvuzi muri Tanzania ziri kugorwa no kubitaho, byatumye abantu bamwe bahwihwisa ko leta iri guhishira uko coronavirus ihagaze.

Muri iyo nama y'ejo ku wa kabiri, Wilbert Ibuge, umunyamabanga uhoraho muri minisiteri y'ububanyi n'amahanga ya Tanzania, yabwiye Inmi Patterson, uwo mudipolomate w'Amerika, ko ubwo butumwa bwarimo amakuru atari ukuri.

Bwana Ibuge yanabwiye Madamu Patterson ko ibyo byashoboraga guteza impagarara mu Banyatanzania no mu basura icyo gihugu.

Itangazo rya minisiteri y'ububanyi n'amahanga ya Tanzania rivuga ko yanamwibukije ko ari ingenzi gutangaza amakuru yabanje kugenzurwa.

Ibyo uruhande rw'Amerika rwasubije kuri ibyo ntabwo byashyizwe muri iryo tangazo.

Kandi ambasade y'Amerika muri Tanzania ntabwo yasubije BBC ku busabe bwo kugira icyo ibivugaho.

Bitandukanye n'ibihugu byinshi byo mu karere k'Afurika y'iburasirazuba, Tanzania yakoreshe uburyo burimo kudohora mu rugamba rwo kurwanya coronavirus.

Ubwo buryo burimo nko kudakoresha gahunda ya "guma mu rugo" ahubwo igihugu kikibanda ku gusigasira ubukungu.

Kuri benshi muri Tanzania, ubuzima bwakomeje nkuko bwari busanzwe mbere yuko coronavirus yaduka.

Ndetse biteganyijwe ko guhera ku itariki ya mbere y'ukwezi gutaha kwa gatandatu, amashuri yisumbuye, amashuri makuru na kaminuza byongera gufungura imiryango.