Coronavirus: Facebook iratangira kuburira abantu ku makuru ayobya ayishyirwaho

Abakoresha Facebook basomye, barebye cyangwa bakwiza amakuru atari yo kuri coronavirus bazabona ubutumwa bubaburira mu gihe iki kigo kiri kugerageza kurwanya gukwiza amakuru atari ukuri.

Ubu buryo bushya bwo kuburira abantu ni ukurwanya icyo umuryango ushinzwe ubuzima ku isi OMS witwa "infodemic" kiriho muri iki gihe cya Covid-19.

Ubushakashatsi bwigenga buvuga ko Facebook ari yo "zingiro ry'amakuru ayobya kuri coronavirus", aho byiganje cyane akaba ari mu ndimi zirimo Igisipanyole.

Kompanyi ya Facebook ivuga ko ubwo bushakashatsi bititaye ku kazi yakoze mu gihe cya vuba.

Iyi kompanyi yo muri California ivuga ko kuva mu byumweru biri imbere itangira kwereka abantu ubutumwa (pop-ups) bubaburira bagifungura konti zabo za Facebook.

Ubwo butumwa buzakujyana kuri 'page' ya OMS aho amakuru y'ibinyoma abeshyuzwa.

Umuvugizi wa Facebook avuga ko bizafasha "abantu bashobora kuba baragezweho n'amakuru ayobya kuri iyi virusi kubona amakuru yizewe y'ababishinzwe, nubwo ayo makuru ayobya baba barayabonye ahandi hatari kuri Facebook".

Izi mpinduka zigiye gukorwa kuri uru rubuga zatewe n'ubushakashatsi bwakozwe n'ikigo Avaaz ku makuru atari ukuri atambuka kuri Facebook.

Abashakashatsi bavuga ko miliyoni nyinshi z'abakoresha Facebook bakomeza kubona amakuru ayobya kuri coronavirus mu gihe nta kibaburira kiri kuri uru rubuga.

Abo bashakasatsi bavuga ko ibinyoma bikomeye cyane kuri iki cyorezo birimo nka; "abirabura ntibafatwa na coronavirus" na "coronavirus yicwa na chlorine dioxide"(umuti ukoreshwa mu gusukura amazi), basanze byararebwe inshuro ibihumbi amagana.

Ikigo Avaaz kivuga ko igiteye impungenge ari uko Facebook idaha ubutumwa abayiriho ko amakuru aya n'aya atari ukuri cyangwa ayobya.

Facebook yo ivuga ko iri gukomeza kwagura abo ikorana nayo mu ndimi zirenga 50 mu kugenzura ukuri kw'amakuru ayishyirwaho.

Amazi na tungurusumu

Ikindi kinyoma aba bashakashatsi basanze cyarakwiriye, ni ikivuga ko abantu bashobora kwikiza iyi virus banyweye amazi menshi na tungurusumu n'umunyu cyangwa vinaigre/vinegar.

Nyuma yo kuyashyiraho, ayo makuru yakwirakwijwe inshuro zirenze 31,000 kuri Facebook, mbere y'uko avanwaho ubwo Avaaz yari imaze kubibwira Facebook.

Gusa, abagiye bayakwiza bo yagumye kuri konti zabo kandi nta kintu Facebook yayashyizeho cyerekana ko ayo makuru atari ukuri.

Mark Zuckerberg, washinze akaba n'umukuru wa Facebook, arengera kompanyi ye yanditse ati:

"Kuri Facebook na Instagram ubu twashyizeho uburyo bwo kujyana abantu barenga miliyari ebyiri ahari amakuru y'abashinzwe ubuzima kuri Covid-19, abarenga miliyoni 350 bakanzeho ngo bamenye byinshi".

Avuga ko iyo hari amakuru ayobya babonye bayavanaho, ko bamaze kuvanaho amakuru ayobya arenga ibihumbi amagana agendanye na Covid-19.

Bwana Zuckerberg avuga ko ubutumwa bwituyeho (pop-ups) bukora kuko 95% bahitamo kutareba ubwo butumwa iyo bwanditse bisanzwe.

Emily Taylor umuhanga mu bigendanye n'amakuru ayobya ku mbuga nkoranyambaga avuga ko batazi neza niba ibi bizakora itandukaniro rinini, gusa ati:

"Ni byiza kubigerageza kuko amakuru ayobya mu gihe cy'icyorezo ashyira ubuzima mu kaga".