Covid-19: Perezida Kagame ati, 'Umubare uzakomeza uzamuke kuko hakomeje gushakishwa abahuye n'abarwayi'

Inyandiko gusa
Perezida Kagame avuga ko ubufasha ku b'amikoro macye bugiye kwihutishwa

Ahavuye isanamu, Getty Images

Insiguro y'isanamu, Perezida Kagame avuga ko ubufasha ku b'amikoro macye bugiye kwihutishwa

Perezida Paul Kagame w'u Rwanda yaraye aburiye abaturage ko umubare w'abamaze kwandura coronavirus mu gihugu uzakomeza kwiyongera, ariko ko ari mu rwego rwo guhashya iki cyorezo burundu.

Minisiteri y'ubuzima ejo yatangaje ko umubare w'abanduye coronavirus kugeza ubu ari 54.

Bwana Kagame yagize ati: "Uyu mubare uzakomeza uzamuke kuko hakomeje gushakishwa abahuye n'abarwayi b'iyo ndwara kugira ngo bapimwe, ndetse abagaragayeho uburwayi bavurwe".

Bwana Kagame avuga ko ari bwo "buryo bwiza bwo gufasha abashobora kuba baranduye mu rwego rwo kurinda imiryango yabo ndetse natwe twese aho dutuye".

b
Coronavirus

Perezida Kagame kandi yahamagariye abaturage gukomeza gushyira mu bikorwa ingamba n'amabwiriza byafashwe, "tukihanganira ingorane zose byaba bitera kugira ngo dutsinde iki cyorezo burundu, cyo guhitana abantu benshi".

Izo ngamba zirimo nko kuguma mu rugo, gusiga intambwe ndende hagati y'umuntu n'undi, gukaraba intoki neza kandi kenshi ndetse no kubimenyesha inzego z'ubuyobozi igihe hari ugaragaje ibimenyetso birimo inkorora y'akayi no guhinda umuriro.

Yavuze ko inzego zitandukanye ziri gutegura uburyo ab'amikoro macye ahanini bari batunzwe n'imirimo y'amaboko bakora bavuye mu rugo, bafashwa kandi ko bigiye kwihutishwa.

Anastase Shyaka, Minisitiri w'ubutegetsi bw'igihugu, yanditse kuri Twitter kuri uyu wa gatandatu ko ubwo bufasha - bw'ibiribwa n'ibindi bikoresho by'ibanze - butangwa urugo ku rundi binyuze muri za komite zo mu mudugudu, akagari n'umurenge.

Skip Ibisomwa cane and continue reading
Ibisomwa cane

End of Ibisomwa cane

Tambuka X ubutumwa
Uremeye ibiri kuri X?

Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.

Uragaba: Ibitangwa n'izindi mbuga bishobora kubamwo gutangaza

Impera ya X ubutumwa

Abari batunzwe n'imirimo nk'iyo bakomeje kugira impungenge ku mibereho yabo mu gihe kuri ubu batemerewe gukora akazi kabo uko bisanzwe.

Bwana Kagame kandi yashimiye abakora mu rwego rw'ubuzima mu gihugu bakomeje kwitanga, ndetse n'ishami ry'umuryango w'abibumbye ryita ku buzima n'umuherwe w'Umushinwa Jack Ma ku nkunga y'ibikoresho byo gupima Covid-19.

Abacuruza amakarita ya telefone ngendanwa ni bamwe mu bagizweho ingaruka zikomeye no kuguma mu rugo

Ahavuye isanamu, Getty Images

Insiguro y'isanamu, Abacuruza amakarita ya telefone ngendanwa ni bamwe mu bagizweho ingaruka zikomeye no kuguma mu rugo

Yongeyeho ati: "Ibyemezo dufata uyu munsi nibyo bizatuma dushobora guhashya iki cyorezo vuba, kugira ngo dusubire mu buzima busanzwe".

Perezida Kagame yatangaje ubwo butumwa - bwa kabiri kuva umurwayi wa mbere yatangazwa mu gihugu mu byumweru bibiri bishize - mu gihe ku munsi w'ejo ku wa gatanu umubare w'abanduye coronavirus mu Rwanda wageze kuri 54.

Ni nyuma yuko kuri uwo munsi w'ejo hiyongereyeho abarwayi bane.

Minisiteri y'ubuzima mu Rwanda ivuga ko abo barwayi harimo umwe wavuye i Dubai n'undi wavuye muri Amerika, aba bakaba barahise bashyirwa mu kato bakihagera.

Abandi ni abantu babiri bayanduriye mu Rwanda bahuye n'abayirwaye, nabo bakaba barashyizwe mu kato.

Iyi minisiteri ivuga ko mu barwayi b'iyi ndwara ubu nta numwe urembye, ko bari koroherwa kandi abenshi muri bo ubu nta bimenyetso by'iyi ndwara bagaragaza.

Nkuko bitangazwa na Kaminuza ya Johns Hopkins yo muri Amerika, kugeza ku munsi w'ejo ku wa gatanu, ku isi hari abarwayi barenga 540,000 ba coronavirus, naho abagera ku 24,000 yari imaze kubica. Abandi 124,000 barayikize.