Coronavirus: Amerika igiye kongera Ubwongereza na Ireland ku bihugu bitemerewe gukora ingendo zijyayo

Inyandiko gusa
Ejo ku wa gatandatu abagenzi bari mbarwa ku kibuga cy'indege mpuzamahanga cya Heathrow i London mu Bwongereza

Ahavuye isanamu, EPA

Insiguro y'isanamu, Ejo ku wa gatandatu abagenzi bari mbarwa ku kibuga cy'indege mpuzamahanga cya Heathrow i London mu Bwongereza

Amerika igiye kongera Ubwongereza na Repubulika ya Ireland ku rutonde rw'ibihugu by'i Burayi bitemerewe gukora ingendo ziyerekezamo.

Icyo cyemezo kizatangira gukurikizwa saa sita z'ijoro z'ejo ku wa mbere ku isaha yo muri Amerika, ni ukuvuga ku isaha ya saa kumi za mu gitondo zo ku wa kabiri ku isaha yo mu Bwongereza, nkuko byatangajwe na Visi Perezida w'Amerika Mike Pence.

Icyemezo cya Perezida Donald Trump cyo guhagarika ingendo zo mu bihugu 26 by'i Burayi bikoresha uburyo bw'umupaka ufunguye wo mu karere kazwi nka Schengen, cyatangiye gukurikizwa ejo ku wa gatandatu.

Bwana Pence yanavuze ko buri Munyamerika agiye gupimwa coronavirus ku buntu.

Ubwo yagira icyo atangaje na we muri icyo kiganiro n'abanyamakuru, Perezida Trump yavuze ko na we yamaze kwisuzumisha. Ibiro bye bya White House nyuma byatangaje ko ntayo bamusanzemo.

Muri Amerika habarurwa abantu 2,700 bamaze kuyandura naho abandi 54 imaze kubica.

Abantu barenga 132,500 bamaze kwandura coronavirus mu bihugu 123 ku isi, nkuko bitangazwa n'ishami ry'umuryango w'abibumbye ryita ku buzima (OMS/WHO).

OMS ivuga ko ubu Uburayi ari ryo "zingiro" ry'iyo virusi yatangiriye mu ntara ya Hubei mu Bushinwa.

Skip Ibisomwa cane and continue reading
Ibisomwa cane

End of Ibisomwa cane

Icyo cyemezo cy'Amerika kiri kwagurwa gute?

Kugeza ejo ku wa gatandatu mu gitondo, Amerika yari yamaze guhagarika ingendo mu gihe cy'iminsi 30 ziva mu bihugu 26 byo mu karere ka Schengen - 22 byo mu muryango w'Ubumwe bw'Uburayi (EU/UE) na bine bitari ibyo muri EU.

Ibyo bihugu ni Autriche (Austria), Ububiligi, Czech Republic, Denmark, Estonia, Finland, Ubufaransa, Ubudage, Ubugereki, Hongrie (Hungary), Iceland, Ubutaliyani, Latvia, Liechtenstein, Lithuania, Luxembourg, Malta, Ubuholandi, Norvège (Norway), Pologne (Poland), Portugal, Slovakia, Slovenia, Espanye, Suède (Sweden) n'Ubusuwisi.

Cyakiriwe gute?

Icyo cyemezo cyo guhagarika ingendo cyakiranywe uburakari n'urujijo mu muryango wa EU, abayobozi muri uwo muryango bashinja Perezida Trump kuba yarafashe icyo cyemezo "atabagishije inama".

Ubwongereza na Repubulika ya Ireland byari byarasonewe, ariko ejo ku wa gatandatu Bwana Trump yagize ati: "Mu buryo bubaje, byakoze ibintu bicye [mu guhashya coronavirus]".

Umubare w'abamaze kwemezwa ko banduye coronavirus mu Bwongereza bageze ku 1,140, naho 21 imaze kubica - bavuye kuri 11 yari imaze kwica ku wa gatanu.

Bwana Pence yavuze ko abaturage b'Amerika baba muri ibyo bihugu ndetse n'abo amategeko y'Amerika yemerera kuba muri Amerika, bavuye muri ibyo bihugu, bo bacyemerewe gusubira muri Amerika.

Yavuze ko abantu nk'abo "bazayoborwa ku bibuga by'indege by'umwihariko bitabweho".