Coronavirus: Ku munsi wa gatatu wikurikiranya abayanduye bashya baragabanutse mu Bushinwa
Ahavuye isanamu, Reuters
Ku munsi wa gatatu wikurikiranya, Ubushinwa bwatangaje ko habayeho kugabanuka kw'umubare w'abantu bashya bandura coronavirus.
Kuri iki cyumweru, abategetsi batangaje ko abantu 2,009 bashya ari bo banduye iyo virusi kuri uyu munsi naho abandi 142 irabica ku rwego rw'igihugu.
Mu ntangirio y'iki cyumweru, umubare w'abayandura bashya wariyongereye cyane nyuma y'impinduka mu buryo bwo kubara abayanduye, ariko kuva icyo gihe bakomeje kugenda bagabanuka.
Bose hamwe, abantu 68,000 ni bo bamaze kwandura coronavirus mu Bushinwa, naho 1,665 ni bo imaze kwica muri iki gihugu.
Hanze y'Ubushinwa, hamaze kugaragara abantu barenga 500 bayirwaye mu bihugu hafi 30. Bane imaze kubica - mu Bufaransa, Hong Kong, Philippines no mu Buyapani.
Kuri iki cyumweru, Mi Feng, umuvugizi w'urwego rw'ubuzima rw'Ubushinwa, yavuze ko ingamba iki gihugu cyafashe mu guhagarika ikwirakwira rya coronavirus zatangiye kugira umumaro.
Wang Yi, Minisitiri w'ububanyi n'amahanga w'Ubushinwa, we yavuze ko igabanuka ry'abayandura bashya rigaragaza ko "muri rusange iki cyorezo kiri guhashywa".
Yongeyeho ko hamwe n'uko kugabanuka kw'abayandura bashya mu ntara ya Hubei, haniyongereye cyane umubare w'abari kuyikira muri iyo ntara.
Ati: "Twakoze ibikorwa byimazeyo byo gukumira no guhashya, ibikorwa byimbitse cyane, kuburyo ntabona ikindi gihugu [ku isi] cyashobora ibintu nk'ibi".
Mu yandi makuru:
- Umubare w'abamaze gusangwamo coronavirus mu bwato Diamond Princess bwashyizwe mu kato mu Buyapani umaze kugera ku bantu 355. Amerika na Canada byohereje indege zo guhungisha abaturage babyo
- Abategetsi bo mu Bufaransa ejo ku wa gatandatu batangaje ko mukerarugendo w'Umushinwa yapfiriye mu Bufaransa nyuma yo kwandura ubu bwoko bushya bwa coronavirus - aba umuntu wa mbere yishe hanze y'umugabane w'Aziya
- Umunyamerikakazi w'imyaka 83 yasanganywe coronavirus nyuma yo kuva mu bundi bwato bwabujijwe guparika n'ibindi bihugu bimwe, mbere yuko bwemererwa guparika muri Cambodia
- Mu Bwongereza, mu bantu icyenda bari barigukurikiranwa mu bitaro umwe gusa ni we ukiri mu bitaro mu gihe abandi bamaze gusezererwa nyuma yo koroherwa
Ejo ku wa gatandatu, Dr Tedros Adhanom Ghebreyesus, umukuru w'ishami ry'umuryango w'abibumbye ryita ku buzima (OMS/WHO), yashimagije Ubushinwa ku buryo buri guhangana na coronavirus.
