Trump yise Trudeau umuntu ugira 'indimi ebyiri' kubera videwo yo mu nama ya NATO

Inyandiko gusa
Trump (ibumoso) na Trudeau (iburyo) mu nama ya NATO yabereye mu mujyi wa Waftord mu Bwongereza muri iki cyumweru

Ahavuye isanamu, Reuters

Insiguro y'isanamu, Trump (ibumoso) na Trudeau (iburyo) mu nama ya NATO yabereye mu mujyi wa Waftord mu Bwongereza muri iki cyumweru

Perezida Donald Trump wa Leta Zunze Ubumwe z'Amerika yavuze ko Justin Trudeau, Minisitiri w'intebe wa Canada, ari umuntu w'"indimi ebyiri".

Ni nyuma yuko hagaragaye videwo agaragaramo asa nk'unnyega Trump mu nama y'abakuru b'ibihugu bigize umuryango w'ubwirinzi uhuriweho n'Amerika n'Uburayi (OTAN / NATO).

Videwo igaragaza Bwana Trudeau na Minisitiri w'intebe w'Ubwongereza Boris Johnson ndetse na Perezida Emmanuel Macron w'Ubufaransa basa nk'abaganira ku kiganiro n'abanyamakuru gihutiyeho cyakoreshejwe na Bwana Trump.

Abategetsi bo mu bihugu 29 bigize NATO basohoye itangazo bemeranya kurangwa n'ubumwe, ariko iyi nama y'uyu muryango yo kwizihiza isabukuru y'imyaka 70 umaze yabereye hafi y'umurwa mukuru London w'Ubwongereza yanaranzwemo n'ubushyamirane bwinshi.

Iryo tangazo rigira riti: "Kugira ngo dukomeze kugira umutekano, tugomba kurebera hamwe ejo hazaza". Abo bategetsi banemeye ko hari "imbogamizi" zitewe n'Ubushinwa n'Uburusiya, ndetse biyemeza "kurwanya bikomeye" iterabwoba.

Bwana Trump yaburijemo ikiganiro n'abanyamakuru cyari giteganyijwe nyuma y'iyo nama.

Ejo ku wa gatatu yabwiye abanyamakuru ati: "Turaza guhita dutaha byihuse. Ntekereza ko twagiranye ibiganiro byinshi n'abanyamakuru".

Abategetsi bo mu bihugu bihuriye muri NATO bakiriwe ku meza n'Umwamikazi Elizabeth w'Ubwongereza

Ahavuye isanamu, Reuters

Insiguro y'isanamu, Abategetsi bo mu bihugu bihuriye muri NATO bakiriwe ku meza n'Umwamikazi Elizabeth w'Ubwongereza

Iyo videwo irimo iki?

Iyo videwo ngufi yatangajwe ku rubuga rwa Twitter n'igitangazamakuru CBC cyo muri Canada, igaragaza Bwana Trudeau aganira n'itsinda ry'abategetsi barimo na Bwana Johnson, Bwana Macron, Minisitiri w'intebe w'Ubuholandi, Mark Rutte, n'umukobwa w'Umwamikazi Elizabeth, igikomangomakazi Anne.

Skip Ibisomwa cane and continue reading
Ibisomwa cane

End of Ibisomwa cane

Bagaragara baganirira mu ngoro y'ibwami izwi ku izina rya 'Buckingham Palace'.

Mu ntangiriro y'iyo videwo, Bwana Johnson abaza Bwana Macron ati: "Iyo ni yo mpamvu wakererewe?"

Nuko Bwana Trudeau agahita atanguranwa ati: "Yakererewe kuko abanza kumara iminota 40 mu kiganiro n'abanyamakuru".

Bwana Macron ahita agaragara nk'ugize icyo avuze cy'ibyamubayeho, ariko amagambo ye ntiyumvikana kubera ko apfukiranwa n'urusaku rubari inyuma.

Nuko Bwana Trudeau, utangaye, agahita asubiza ati: "Eeee, ni byo, ni byo, ni ko yavuze... [ibikurikira ntibyumvikana]. Umaze kubona ukuntu abo bakorana batangara cyane".

Nta n'umwe muri iryo tsinda ugaragara nkaho azi ko barimo gufatwa amajwi n'amashusho.

Trump yasubije iki?

Mu gusubiza Bwana Trudeau, Bwana Trump yagiz ati: "Afite indimi ebyiri...Mbona ari umuntu mwiza, ariko ukuri ni uko namubwije ukuri ko atadatanga [umusanzu wa] 2% [by'ingengo y'imari y'igisirikare cy'igihugu cye] kandi ndibwira ko ibyo bitamushimishije na gato".

"Ntabwo ari kuriha 2% kandi yagakwiye kuba ariha 2%. Canada - bafite amafaranga. Umva, mpagarariye Amerika kandi akwiye kuba ariha arenze ayo ariha [muri NATO], arabizi..."

"Nshobora kubyumva ko ibyo bitamushimisha, ariko ni uko bimeze".

Abajijwe ku bijyanye n'iyo videwo, Bwana Johnson yabwiye abanyamakuru ati: "Ni ibintu bitumvikana na gato. Sinzi aho byavuye".

Bwana Trudeau nyuma yabwiye abanyamakuru ko we n'abo bagaragara bari kumwe muri iyo videwo batarimo bannyega ikiganiro n'abanyamakuru cya Bwana Trump.

Yavuze ko ahubwo bannyegaga ahazabera inama itaha y'ibihugu birindwi bikize cyane ku isi ya G7, izabera ahitwa Camp David, haruhukirwa na perezida w'Amerika.

Yongeyeho ati: "Mfitanye umubano mwiza cyane na Trump".