Umwana waciwe amaguru wo mu Bwongereza ubu agiye kumurika imideli kuri Tour Eiffel n'i New York

Inyandiko gusa
Nyuma yaho bihishuriwe ko Daisy-May Demetre azamurika imideli i New York, yatumiwe no kuyimurika i Paris

Ahavuye isanamu, ALEX DEMETRE

Insiguro y'isanamu, Nyuma yaho bihishuriwe ko Daisy-May Demetre azamurika imideli i New York, yatumiwe no kuyimurika i Paris

Umwana w'umukobwa w'imyaka icyenda waciwe amaguru, ubu agiye kumurika imideli ku gasongero k'umunara wa Tour Eiffel mu cyumweru cyahariwe imurika ry'imideli (fashion week) mu murwa mukuru Paris w'Ubufaransa.

Bikurikiye inkuru yuko uyu Daisy-May Demetre agiye kuba umwana wa mbere waciwe amaguru yombi ugiye kumurika imideli by'akazi mu cy'umweru cy'imurika ry'imideli i New York muri Amerika.

Uwashinze inzu y'imideli ya Lulu et Gigi Couture yavuze ko bitekerezwa ko azaba abaye n'umwana wa mbere waciwe amaguru umuritse imideli i Paris.

Eni Hegedus-Buiron, washinze Lulu et Gigi Couture, yavuze ko uyu mwana "azaniye isi ubukangurambaga".

Daisy w'i Birmingham mu Bwongereza watangiye kumurika imideli afite imyaka umunani, yavukanye indwara izwi nka "fibular hemimelia", aho amwe cyangwa amagufa yose yo mu kaguru aba atarimo.

Ibyo byatumye amaguru ye acibwa ubwo yari akiri uruhinja.

'Nta myiteguro akeneye'

Alex, se w'uyu mwana, yavuze ko inkuru yuko azamurika imideli i New York ku itariki ya 8 y'uku kwezi kwa cyenda, ari yo yatumye atumirwa no kuyimurika i Paris.

Yari asanzwe yaramurikiye imideli iyi nzu ya Lulu et Gigi Couture i London mu Bwongereza, ariko ari gusa mu bikorwa by'icyumweru cyo kumurika imideli cyagenewe abana.

Skip Ibisomwa cane and continue reading
Ibisomwa cane

End of Ibisomwa cane

Daisy mu bikorwa byo kumurika imideli i London by'inzu ya Lulu et Gigi Couture

Ahavuye isanamu, BEAR AND PINE

Insiguro y'isanamu, Daisy mu bikorwa byo kumurika imideli i London by'inzu ya Lulu et Gigi Couture

Se yagize ati: "Urebye abantu [bakomeye] baba bahari, nta handi hakomeye kuharusha uba wakwifuza kugera habaho".

"Namubwiye ukuntu ari ibintu bikomeye, nuko arambwira ati, 'Papa, ni byiza'".

"Namubajije niba ashaka kwitoza, nuko arambwira ati, 'Narabikoze mbere'".

"Ariko arabikwiye, yarabiharaniye".

"Iyo abantu bamubonye ntabwo bavuga ngo 'Mbega Daisy umerewe nabi', ahubwo baravuga bati, 'Mbega Daisy uteye ubwuzu', kuko aba afite imbaraga nyinshi cyane".

Iryo murika ry'imideli rizabera ku gasongero k'umunara wa Tour Eiffel ku itariki ya 27 y'uku kwezi kwa cyenda.

Eni Hegedus-Buiron, washinze inzu y'imideli ya Lulu et Gigi Couture ikaba ari yo Daisy azaba ari kumurikira imideli, yagize ati: "Daisy ni umwana ukunda ibyo akora".

"Twasabwe n'ibyishimo kubera ubukangurambaga bwose azaniye isi".