Leta ya Alabama muri Amerika yemeje umushinga w'itegeko ribuza gukuramo inda

Inyandiko gusa
Abarwanya gukuramo inda bo muri leta ya Philadelphia

Ahavuye isanamu, Getty Images

Insiguro y'isanamu, Abarwanya gukuramo inda bakiriye neza icyo cyemezo

Abashimangamategeko muri leta ya Alabama, imwe mu zigize Leta Zunze Ubumwe z'Amerika, bemeje umushinga w'itegeko rihana gukuramo inda, bisanzwe byemewe na leta nyinshi muri Amerika.

Aba banyamategeko barekeye gusa ubwo burenganzira abafashwe ku ngufu n'abatewe inda n'abo bafitanye isano ya hafi cyangwa igihe ubuzima bwe n'uwo atwite buri mu kaga.

Uyu mushinga w'itegeko urajya kwa Kay Ivey, Guverineri w'iyi leta. Ntiyatangaje niba ari buwushyireho umukono, gusa asanzwe azwi nk'umugore udashyigikira ibyo gukuramo inda.

Nuramuka wemejwe nk'itegeko, uyu mushinga w'itegeko, wateje impaka zikomeye, uzabuza gukuramo inda mu buryo hafi ya bwose.

Muri uyu mwaka, muri leta 16 muri Amerika hagiyeho amabwiriza "ananiza" gukuramo inda.

Abarwanya ibi bavuga ko uyu mushinga w'itegeko wo muri leta ya Alabama ubusanya n'ingingo y'itegeko ryo mu 1973 itanga uburenganzira busesuye bwo gukuramo inda.

Ishyirahamwe ry'abagore muri Amerika ryatangaje ko uyu mushinga w'itegeko ubangamiye abagore kandi ugamije guha imbaraga abakandida barwanya gukuramo inda mu matora yimirije.

Impirimbanyi ziharanira kugira uburenganzira bwo gukuramo inda zari ziri mu myigaragambyo mu murwa mukuru Montgomery wa leta ya Alabama, mu gihe habaga izo mpaka ku munsi w'ejo ku wa kabiri

Ahavuye isanamu, Reuters

Insiguro y'isanamu, Impirimbanyi ziharanira kugira uburenganzira bwo gukuramo inda zari ziri mu myigaragambyo mu murwa mukuru Montgomery wa leta ya Alabama, mu gihe habaga izo mpaka ku munsi w'ejo ku wa kabiri

Umushingamategeko wo mu ishyaka ry'abarepubulikani, Terri Collins, avuga ko batoye uwo mushinga w'itegeko kuko bumva ko "umwana uri mu nda ari umuntu".

Skip Ibisomwa cane and continue reading
Ibisomwa cane

End of Ibisomwa cane

Bijyanye n'uwo mushinga w'itegeko wo muri Alabama, umuganga ashobora gufungwa imyaka 10 mu gihe ahamwe no kugerageza gukuriramo umuntu inda, n'imyaka 99 y'igifungo mu gihe yabikoze.

Icyakoze ntuteganya ibihano ku mugore cyangwa umukobwa wakuyemo inda.

Mu bihugu byinshi by'Afurika, amategeko abuza kandi agahana gukuramo inda. Muri Uganda, Tanzaniya, Kenya n'u Burundi, byemewe gusa mu gihe cyo gukiza ubuzima bw'utwite.

Mu Rwanda, amategeko yemerera gukuramo inda umwana (utaragira imyaka 18), uwafashwe ku ngufu, uwatewe inda n'uwo bafitanye isano ya hafi, no kuba inda ibangamiye ubuzima bw'utwite cyangwa umwana uri mu nda.