Umuvugizi w'akabana kajejwe amatora muri Repubulika y'Intwaro rusangi ya Congo (RD Congo), Jean-Pierre Kalamba yabwiye BBC ko vyoshika amatora yo ku munsi wa Mungu akungururizwa ku rindi sango.

Yavuze ko mu gihe ibikoresho bikenewe mu matora vyoba bitaregeranywa ko vyoba vyiza ko amatora yunguruzwa iminsi mike hakwihutira kuja mw'ico gikorwa.

Mu ndwi iheze, umuriro warateye ububiko bw'akanama kajejwe amatora, bibiri vya gatatu vy'amamashini yokoreshejwe mu gisagara ca Kinshasa arononekara.

Igihugu ca RD Congo kingana n'Uburaya bwo mu burengero - gushikana ibikoresho ku biro vy'amatota 75000 bisanzwe bitoroshe.

Akanama kashikirije ivyo mu gihe ku munsi wa Gatatu abajejwe intwaro nabo basohoye ingingo yo guhagarika kwiyamamariza mu muji wa Kinshasa ku mvo z'umutekano.

Iyo ngingo yatangajwe hasigaye amasaba makeyi gusa ngo umukandida atavuga rumwe na leta, Martin Fayulu, aremeshe igikorane co kwiyamamaza.

Umukuru w'igisagara ca Kinshasa, Andre Kimbuta, asanzwe ari umunywanyi w'umugambwe uri ku butegetsi, yavuze ko abo yise intagondwa bamaze gucengera mu migambwe yose.

Ngo bariko barategura guteza akaguma i Kinshasa, ahasanzwe hagwiriye abatavuga rumwe na leta.

Mu gihe umukuru w'igihugu Joseph Kabila agomba gusubirizwa, ano matora afise akamaro kanini cane kuko buzoba ari ubwa mbere habaye ukubisikanya biciye mu matora muri Kongo.

Ukubisikanya ku butegetsi kwagiye kuraba mbere, kwamye gukurikirwa n'ubwicanyi bukomeye.